படத்தலைப்புகளுக்கு என் பெயரைப் பயன்படுத்த வேண்டாம்! - ரஜினிகாந்த்

Heroes

oi-Shankar

By Shankar

| Published: Tuesday, December 6, 2011, 11:28 [IST]

ரஜினியின் பெயர் மட்டுமே ஒரு படத்துக்கு எந்த அளவு விளம்பரத்தையும் ஆரம்ப வசூலையும் குவிக்கும் என்பதற்கு ரா ஒன் ஒரு நல்ல உதாரணம்.

இன்றைக்கு ரஜினியின் பெயரை எப்படியாவது தலைப்பில் கொண்டு வந்துவிட வேண்டும் என்பது நிறைய பேரின் விருப்பமாக உள்ளது.

விரைவில் வெளியாகவிருக்கும் ஒரு புதிய தமிழ்ப் படத்தின் பெயர், பெருமான் - தி ரஜினிகாந்த். ராஜேஷ் கன்னா என்பவர் இயக்கும் படம் இது. இந்தத் தலைப்புக்கு முதலில் ரஜினி தரப்பில் ஆட்சேபணை எதுவும் சொல்லவில்லை. ஆனால் பின்னர், இந்தத் தலைப்பில் உள்ள தனது பெயரை மட்டும் நீக்கிவிடுமாறு கேட்டுக் கொண்டாராம் ரஜினி, தனது செய்தித் தொடர்பாளர் சுதாகர் மூலம்.

இதுகுறித்து சுதாகர் கூறுகையில், "பெருமான் என்றால் அனைத்துக்கும் மேலான இறைவனைக் குறிக்கும். இறைவனை விட மேலானவர் ஒருவர் இல்லை என்பதை நம்புவர் ரஜினி சார். இந்தத் தலைப்பை அனுமதித்தால் அது தவறான புரிதலுக்கு வழி வகுக்கும் என்பதால், நீக்கும்படி கேட்டுக் கொண்டார் ரஜினி," என்றார்.

கன்னடத்தில் 'ரஜினிகாந்தா' என்ற தலைப்பில் மஜ்னு என்பவர் ஒரு படத்தை உருவாக்கி வருகிறார். இரட்டையர் பற்றிய கதை இது.

இதுகுறித்து மஜ்னு கூறுகையில், "அனைவருக்குமே முன்மாதிரி ரஜினி சார்தான். எனது படம் குறித்து அவருக்கு விளக்கிச் சொல்லிவிட்டேன். தலைப்பு மட்டும்தான் சார் பெயரைக் குறிப்பது போலிருக்கும். மற்றபடி எந்த இடத்தில் அவரைத் தொடர்பு படுத்தவில்லை. இதைக் கேட்டபிறகு ரஜினி சார் ஒப்புதல் அளித்துவிட்டார்," என்றார்.

மராத்தியில் ஒருபடம் ரஜினிகாந்த் என்ற பெயரிலேயே தொடங்கப்பட்டு பின்னர் கைவிடப்பட்டுள்ளது.

ரஜினி பெயருடன் கூடிய 10-க்கும் மேற்பட்ட தலைப்புகள் தமிழ் சினிமா தயாரிப்பாளர் சங்கத்தில் பதிவு செய்யப்பட்டுள்ளன.

ஆனால் இவர்கள் அனைவருக்குமே ரஜினி தரப்பிலிருந்து பொதுவான ஒரு அறிவிப்பு வெளியாகியுள்ளது. சுதாகர் வெளியிட்டுள்ள அந்த அறிவிப்பில், "இனி யாரும் தயவு செய்து தன் பெயரைத் தொடர்புபடுத்தி தலைப்பு வைக்காதீர்கள் என்று ரஜினியே கூறிவிட்டார்," என்று தெரிவித்துள்ளார்.