புலி விஜயின் 41 வது பிறந்தநாள் இன்று...

சென்னை: இளையதளபதி என்று ரசிகர்களால் அழைக்கப்படும் நடிகர் விஜயின் 41வது பிறந்தநாள் இன்று. தமிழ்த் திரை இயக்குநர் எஸ்.ஏ.சந்திரசேகர் பின்னணிப்பாடகி ஷோபா இருவருக்கும் 1974 ம் ஆண்டு ஜூன் மாதம் 22 ம் தேதி மகனாகப் பிறந்தவர்.

நடிகர், பின்னணிப்பாடகர், தயாரிப்பாளர் எனப் பன்முகங்கள் கொண்டவர் நடிகர் விஜய். முழுப்பெயர் ஜோசப் விஜய் சந்திரசேகர், படித்தது லயோலா கல்லூரியில்.

1999 ம் ஆண்டு தனது 25 வது வயதில் லண்டனைச் சேர்ந்த சங்கீதா என்ற பெண்ணை மணம் முடித்த விஜய்க்கு சஞ்சய், திவ்யா என்ற இரு குழந்தைகள் உள்ளனர்.

இன்று தன்னுடைய 41 வது பிறந்தநாளை கொண்டாடிக்கொண்டு இருக்கும் நடிகர் விஜய் பற்றிய சில சுவையான தகவல்களை இங்கு பார்க்கலாம்.

1.விஜயின் அப்பா சந்திரசேகர் விஜயகாந்தை வைத்து இயக்கிய வெற்றி, நான் சிகப்பு மனிதன், வசந்த ராகம், சட்டம் ஒரு விளையாட்டு, இது எங்க பூமி போன்ற படங்களில் சின்ன வயது விஜயகாந்தாக நடித்திருப்பார்.

2.ஹீரோவாக அறிமுகமான முதல் படம் நாளைய தீர்ப்பு. முதல் படநாயகி கீர்த்தனா, ஆண்டு 1992.ஆரம்ப காலத்தில் ஹீரோவாக நடித்த சில படங்கள் ஓடவில்லை. பின்பு நடிகர் விஜயகாந்துடன் இணைந்து நடித்த செந்தூரப் பாண்டி படம்தான் விஜயை ஒரு நடிகராக மக்களிடம் கொண்டு சேர்த்தது.

3.விஜய் சிறுவயதில் மிகவும் கலகலப்பாக இருப்பாராம். தங்கை வித்யா சிறுவயதில் இறந்துவிட அதனைத் தாங்க முடியாமல் அன்றிலிருந்து இப்படி அமைதியாக இருக்கத் தொடங்கி விட்டாராம்.

4. விஜயின் நடனம் இன்று சிறுவர்கள் முதல் பெரியவர்கள் வரை ரசிக்கப் படுகிறது. இதற்குக் காரணம் ஒரு நடன இயக்குனர் தானாம். சிறு வயதில் ஒரு பாடலுக்கு நடனம் ஆடும்பொழுது ஒழுங்காக ஆடாததால் அவர் திட்டிவிட, அந்தத் திட்டை ஒரு வைராக்கியமாக எடுத்துக் கொண்டு பல நாட்கள் வெறித்தனமாக வீட்டில் ஆடி நடனம் கற்றுக் கொண்டாராம்.

5.சாப்பிடும்போது ஒரு முறை தட்டில் சாப்பாடை எடுத்துக் கொண்டால் அதை மட்டும் சாப்பிட்டு விட்டு எழுந்து போய்விடுவாராம்,மீண்டும் எடுத்துப் போட்டு சாப்பிட மாட்டாராம்.

6. விஜயுடன் அதிகமாக ஜோடி சேர்ந்து நடித்த நடிகை சங்கவிதான். இருவரும் இணைந்து நடித்த ரசிகன் படம் 175 நாட்கள் ஓடி வெள்ளிவிழா கொண்டாடியது, விஜயின் முதல் வெள்ளிவிழா படமும் அதுதான்.

7. த்ரிஷா, சிம்ரன், ஜோதிகா சங்கவிக்கு அப்புறம் விஜயுடன் அதிகமாக இணைந்து நடித்த நடிகைகள் இம்மூவரும் தான்.

8. உடைகளில் பிடித்தது எளிமையான உடைகள் மட்டுமே, விரும்பி அணிவது வெள்ளை சட்டை.

9. கலரில் மிகவும் பிடித்தது கருப்பு, வீட்டில் இருக்கும் எல்லா கார்களுமே கருப்புதான்.

10. ரசிகனுக்குப் பிறகு விஜய் நடித்த படங்களில் அதிகம் ஓடியது கில்லி, அதிகம் வசூலித்து சாதனை செய்த படம் துப்பாக்கி.

11.செண்டிமெண்ட் ஹீரோவாக மாறியது காதலுக்கு மரியாதை படத்திற்குப் பின்பு தான்.

12.இதுவரை மொத்தம் 14 ரீமேக் படங்களில் நடித்திருக்கிறார் விஜய். காதலுக்கு மரியாதை, நினைத்தேன் வந்தாய், பிரியமானவளே, பிரண்ட்ஸ், பத்ரி,யூத், வசீகரா, கில்லி,ஆதி, போக்கிரி,வில்லு, காவலன், வேலாயுதம் மற்றும் நண்பன்.

13.இதுவரை இரண்டு படங்களில் போலீசாக நடித்திருக்கிறார். போக்கிரி, ஜில்லா.

14. இரண்டு படங்களில் இரட்டை வேடங்களில் நடித்திருக்கிறார் அழகிய தமிழ்மகன், கத்தி.

15.சினிமாவில் ஹீரோவாக நடிக்கும் ஆசையில் அப்பாவிடம் முதலில் பேசிக் காட்டியது அண்ணாமலை படத்தின் வசனங்களைத் தான்.

16.இதுவரை நான்கு படங்களில் சக நடிகர்களுடன் சேர்ந்து நடித்திருக்கிறார். நேருக்கு நேர், பிரண்ட்ஸ் படத்தில் சூர்யா, நண்பன் படத்தில் ஜீவா மற்றும் ஸ்ரீகாந்த், ஜில்லா படத்தில் நடிகர் மோகன்லால்.

17.பிறமொழிப் படங்களில் சேர்ந்து நடிக்க மாட்டேன் என்பதில் உறுதியாக இருக்கிறார்.

18.பிரபுதேவாவின் வேண்டுகோளுக்காக இந்தி நடிகர் அக்சய் குமாருடன் இணைந்து ரவுடி ரத்தோர் படத்தில் ஒரு பாடலுக்கு மட்டும் ஆடியிருக்கிறார்.

19.இதுவரை தமிழில் 22 இயக்குனர்களை அறிமுகபடுத்திய பெருமை விஜயை சாரும்.

20.விஜய் படங்களுக்கு அவரின் காஸ்ட்யூம் டிசைனர் மனைவி சங்கீதா தான், இதற்காக சம்பளம் எதுவும் வாங்குவது இல்லையாம் சங்கீதா.

21.முதன்முதலில் ரசிகன் படத்தில் தேவாவின் இசையில் "பாம்பே சிட்டி சுக்கா ரொட்டி" பாடலைப் பாடினார். இதுவரை சினிமாவில் 30 க்கும் அதிகமான பாடல்களைப் பாடி இருக்கிறார் அத்தனையும் ஹிட் பாடல்கள் என்பது குறிப்பிடத்தக்கது.

22.முதன்முதலில் விஜயைப் பாடவைத்த இசையமைப்பாளர் தேவா, தற்போது அட்லீ இயக்கத்தில் விஜய் நடிக்க இருக்கும் விஜய் 56 படத்தில் ஜி.வி.பிரகாஷின் இசையில் ஒரு பாடலைப் பாடி இருக்கிறார்.

23.இந்தியில் இன்று கொடிகட்டிப் பறக்கும் பிரியங்கா சோப்ராவின் முதல் ஹீரோ விஜய் தான் படம் தமிழன்.

24.5 முன்னணி பாலிவுட் ஹீரோயின்களுடன் இதுவரை டூயட் பாடி இருக்கிறார் விஜய் பிரியங்கா சோப்ரா, இலியானா, அமீஷா படேல், ஹாசல் ஹரோவ்னி மற்றும் பிபாசா பாசு ஆகியோர்தான் அந்த ஐவர்.

25.பாடல்களில் பிடித்தது இளையராஜாவின் பாடல்கள், காமெடி நடிகர்களில் பிடித்தவர் நடிகர் கவுண்டமணி.

26.இதுவரை மொத்தம் 60 படங்களில் நடித்திருக்கிறார்.(அட்லீ படத்தையும் சேர்த்து).

27.தனது படங்கள் இல்லாமல் பிற நடிகர்களின் படத்திற்காக பின்னணி பாடியிருக்கிறார். அந்த இரு படங்கள் சூர்யாவின் பெரியண்ணா மற்றும் விக்னேஷின் வேலை.

28.விஜயுடன் அதிக படங்களில் சேர்ந்து நடித்த காமெடி நடிகர் சார்லி.

29.இப்போது எந்த பேட்டிகளும் அதிகம் கொடுக்காத விஜய், குங்குமத்தில் ஒரு 12 வருடங்களுக்கு முன்பு தனது முழுவாழ்க்கையையும் தொடராக எழுதி இருக்கிறார். தமிழ்நாட்டு மக்களிடம் மிகுந்த வரவேற்பைப் பெற்ற தொடர் அது, சற்று சரிந்திருந்த குங்குமத்தை மேலே கொண்டுவர விஜயின் பேட்டி பெரிதும் உதவியது.

30. தனது ரசிகர் மன்றத்தை மக்கள் நற்பணி மன்றமாக 2009 ம் ஆண்டில் இருந்து மாற்றி மக்களுக்கு நலத்திட்ட உதவிகளை தனது ரசிகர்கள் மூலமாக செய்து வருகிறார்.

31. வருடாவருடம் சுமார் 5 லட்சம் மாணவர்களுக்கு நோட்டுப்புத்தகங்களை வழங்கி வருகிறார். சில மாணவர்களை தத்தெடுத்து அவர்களின் கல்விசெலவை தனது சொந்தப் பணத்தில் செய்து வருகிறார் விஜய்.

32. இதுவரை இரண்டு படங்களில் வக்கீலாக நடித்திருக்கிறார், சுக்ரன் மற்றும் தமிழன்.

33. ஷாஜகான், லவ் டுடே மற்றும் பூவே உனக்காக இந்த மூன்று படங்களிலும் நாயகியுடன் கடைசியில் சேர முடியாதவராக நடித்திருப்பார்.

34. பிரியமுடன் இந்த ஒரே படத்தில் மட்டும் கடைசியில் இறந்து போகிறவராக நடித்திருப்பார் விஜய்.

35. பிரியமுடன் மற்றும் அழகிய தமிழ்மகன் இந்த இரண்டு படங்களிலும் ஆண்டி ஹீரோவாக நடித்திருக்கிறார்.

36. இந்தி நடிகர் அமிதாப்பை மிகவும் பிடிக்கும், அவரின் படங்கள் வெளிவந்தவுடனேயே பார்த்து விடுவதை வழக்கமாக வைத்திருக்கிறார்.

37. அம்மா ஷோபாவுடன் இணைந்து ஜாஸ் ஆலுக்காஸ் விளம்பரத்தில் நடித்திருக்கிறார்.

38. இதுவரை நடித்த படங்களுக்காக மொத்தம் 25 விருதுகளை வாங்கி இருக்கிறார்.

39. எங்கு இருந்தாலும் பிறந்தநாள் அன்று அம்மா அப்பாவை சந்தித்து அவர்களின் காலில் விழுந்து ஆசீர்வாதம் வாங்குவதை வழக்கமாக வைத்திருக்கிறார்.

40. ஜோஸ் ஆலுகாஸ் நகைக்கடையின் விளம்பரத் தூதுவராக இருந்தாலும் கூட தங்கத்தில் நகைகள் அணியும் வழக்கம் கிடையாது விஜயிடம்.

41. நடித்த முதல் படமான வெற்றியில் விஜயின் சம்பளம் 500, தற்பொழுது 15 கோடிகளுக்கும் அதிகமாக வான்குவதகக் கேள்வி.