ஜெனிஃபர் லோபஸ் – பென் அஃப்லெக் டும் டும் டும் : 20 ஆண்டுகள் பிரேக் அப்பை வென்ற தெய்வீகக் காதல்

முதல் காதல் முற்றிலும் கோணல்

2002ம் ஆண்டில் வெளியாகி கடும் சர்ச்சையை ஏற்படுத்திய 'Gigli' என்ற ஹாலிவுட் படத்தில் இணைந்து நடித்த ஜெனிஃபர் லோபஸ், பென் அஃப்லெக், தொடர்ந்து 'Jersy Girl' படத்திலும் ஜோடி சேர்ந்தனர். அப்போது இருவருக்கும் இடையே காதல் துளிர்விட, அது நிச்சயதார்த்தத்தில் சென்று முடிந்தது. ஆனாலும் திடீரென இருவரும் ஆளுக்கொரு திசையில் பிரிந்து சென்று ஹாலிவுட் ரசிகர்களை பெரும் சோகத்தில் ஆழ்த்தினர்.

நிச்சயம் இங்க... கல்யாணம் அங்க...

பிரிந்த வேகத்தில் இருவருமே தங்களுக்கு வேறொரு துணையை தேடிக் கொண்டு திருமணமும் செய்து கொண்டனர். அதே ஆண்டில் ஜெனிஃபர் லோபஸ் மார்க் ஆண்டனியையும், பென் அஃப்லெக் 2005ல் ஜெனிஃபர் கார்னரையும் மணமுடித்துக் கொண்டு புதிய பாதையில் பயணித்தனர். ஆனாலும், இந்த வித்தியாச திருமணங்கள் சில வருடங்களிலேயே தீயில் கருகிய சருகாய் பொசுங்கிவிட, மீண்டும் இருவரும் தனிமையில் வாடி வந்தனர்.

திரும்பவும் முதல்ல இருந்தா

இடைபட்ட காலங்களில் மன்மதனாக ரவுண்டு கட்டிய பென் அஃப்லெக், பிரபல ஹாலிவுட் நடிகையான ஆனா டி ஆர்ம்ஸுடன் டேட்டிங்கில் பிஸியாக இருந்தார். இருவரும் திருமணம் செய்துகொள்வார்கள் என எதிர்பார்க்கப்பட்ட நிலையில், அதுவும் பொய்யாகிப் போனது. இதனால் ஜெனிஃபர் லோபஸ் - பென் அஃப்லெக் ஜோடி மீண்டும் இணைவார்கள் என கிசுகிசுக்கப்பட்டு வந்த நிலையில், உண்மைக் காதல் மெய்யாகிப் போன கதையாக, இருவரும் தற்போது திருமணம் செய்துள்ளனர்.

காதலே இளமையின் ரகசியம்

52 வயதான ஜெனிஃபர் லோபஸும், 49 வயதான பென் அஃப்லெக்கும் கடந்த ஏப்ரல் மாதம் மீண்டும் நிச்சயதார்த்தம் செய்துகொண்டதாக அறிவித்திருந்தனர். இதனையடுத்து அமெரிக்காவின் லாஸ் வேகாஸில் இருவரும் திருமணம் செய்துகொண்ட புகைப்படங்கள் இணையத்தில் வைரலாகி வருகின்றன. அதுமட்டும் இல்லாமல் வெள்ளை நிறத்தில் நீளமான கவுன் அணிந்தபடி தேவதையாக காட்சித் தரும் ஜெனிஃபர் லோபஸ், 'I am feeling Amazing' என தனது மகிழ்ச்சியை வெளிப்படுத்தியுள்ள வீடியோவும் வைரலாகியுள்ளது.