தளபதி 66ல் விஜய்க்கு அம்மாவாகும் பிரபல நடிகை... அதிகாரப்பூர்வ அறிவிப்பு

தளபதி 66 படம்

நடிகர் விஜய் பீஸ்ட் படத்தின் வசூல்வேட்டையை தொடர்ந்து தற்போது தளபதி 66 படத்தில் நடித்து வருகிறார். இந்தப் படத்தை பிரபல தெலுங்குப்பட இயக்குநர் வம்சி படிப்பள்ளி இயக்கி வருகிறார். இவர் முன்னதாக தமிழில் கார்த்தி, நாகார்ஜூனா நடிப்பில் வெளியான தோழா படத்தை இயக்கியவர்.

ஐதராபாத்தில் 2வது கட்ட சூட்டிங்

தளபதி 66 படத்தை தில் ராஜூ தயாரித்து வருகிறார். இந்தப் படத்தின் முதல்கட்ட சூட்டிங் கடந்த சில வாரங்களுக்கு முன்பு சென்னையில் பூஜையுடன் துவங்கப்பட்டு நிறைவடைந்துள்ளது. இதையடுத்து தற்போது ஐதராபாத்தில் இரண்டாவது கட்ட சூட்டிங் துவங்கப்பட்டு விறுவிறுப்பாக நடைபெற்று வருகிறது.

சூட்டிங்கில் இணைந்த பிரபல நடிகர்கள்

இந்தப் படத்தின் சூட்டிங்கில் நடிகர் ஷாம், யோகிபாபு உள்ளிட்டவர்கள் கடந்த சில தினங்களுக்கு முன்பு இணைந்தனர். இதையடுத்து நேற்றைய தினம் நடிகர் பிரகாஷ் ராஜ், சரத்குமார் மற்றும் பிரபு படத்தின் சூட்டிங்கில் இணைந்துள்ளதாக அதிகாரப்பூர்வமாக அறிவிக்கப்பட்டுள்ளது. அவர்களும் பதிலுக்கு இதுகுறித்து மகிழ்ச்சி தெரிவித்து பதிவை வெளியிட்டுள்ளனர்.

குடும்ப சென்டிமெண்ட்

படம் குடும்ப சென்டிமெண்ட்டாக உருவாகி வருகிறது. விஜய் படங்களுக்கே உரிய ஆக்ஷன், காமெடியும் படத்தில் சிறப்பாக இருக்கும் என்று முன்னதாக தயாரிப்பாளர் தில் ராஜூ பேட்டியொன்றில் தெரிவித்திருந்தார். இந்தப் படத்தின் சூட்டிங் விறுவிறுப்பாக நடைபெற்று வரும் நிலையில், படம் இந்த ஆண்டே தீபாவளி ரிலீசாக வெளியாகும் என்று எதிர்பார்க்கப்பட்டது.

விஜய்யின் அம்மாவாக ஜெயசுதா

ஆனால் படம் அடுத்த ஆண்டு பொங்கல் ரிலீசாக வெளியாக உள்ளதாக தகவல்கள் தெரிவிக்கின்றன. இந்நிலையில் இந்தப் படத்தின் அழகிய இணைப்பாக முன்னாள் ஹீரோயின் ஜெயசுதா இணைந்துள்ளார். அவர் விஜய்யின் அம்மாவாக இந்தப் படத்தில் நடிக்கவுள்ளதாக கூறப்பட்டுள்ளது.

அதிகாரப்பூர்வ அறிவிப்பு

இதுகுறித்து படக்குழு அதிகாரப்பூர்வமாக ட்விட்டர் பக்கத்தில் அறிவித்துள்ளது. இவர் முன்னதாக வம்சியின் தோழா படத்தில் கார்த்தியின் அம்மாவாக நடித்துள்ளது குறிப்பிடத்தக்கது. இந்நிலையில் தற்போது மீண்டும் அவரது இயக்கத்தில் இணைந்துள்ளார். படத்தில் நடிகர்கள், நடிகைகள் குறித்து தொடர்ந்து படக்குழு அப்டேட் தெரிவித்து வருவது ரசிகர்களை உற்சாகப்படுத்தி வருகிறது.

நடிகை ஜெயசுதா

நடிகை ஜெயசுதா ஒரு காலகட்டத்தில் மிகவும் பிரபலமான நடிகையாக, ஹீரோயினாக இருந்தவர். இவரது பல படங்கள் மிகவும் சிறப்பாக ரசிகர்களை கவரும் வகையில் இருக்கும். பாலசந்தர் இயக்கத்திலும் இவர் நடித்துள்ளார். அபூர்வ ராகங்கள் படத்தில் இவர் நாக்கை சுழற்றி செய்யும் ஒரு செயல் அந்த காலகட்டத்தில் ரசிகர்களை வெகுவாக கவர்ந்தது.