எனக்கு கமலைத்தான் அதிகமாக பிடிக்கும்.. தயக்கமே இல்லாமல் சொன்ன பர்த்டே பேபி குஷ்பூ!

நடிகை குஷ்பூ

நடிகை குஷ்பூ இந்திய அளவில் மிகவும் சிறப்பான நடிகையாகவும் சிறந்த தயாரிப்பாளர், டிவி தொகுப்பாளர், சின்னத்திரை சீரியல் தயாரிப்பாளர், அரசியல்வாதி என பன்முகங்களை காட்டி வருகிறார். இன்றைய தினம் குஷ்பூ தனது பிறந்தநாளை கொண்டாடி வரும் சூழலில் அவருக்கு வாழ்த்துக்கள் குவிந்து வருகின்றன.

முன்னணி நடிகை

தென்னிந்திய அளவில் முன்னணி நடிகர்களுடன் பல சிறப்பான படங்களை தேர்ந்தெடுத்து நடித்தவர் நடிகை குஷ்பூ. இந்தியிலும் படங்களில் நடித்துள்ளார். தமிழில் ரஜினி, கமல், விஜய்காந்த், சரத்குமார், பிரபு, சத்யராஜ் என முன்னணி நடிகர்களுடன் நடித்துள்ளார். மற்ற நடிகைகளுக்கு இல்லாத சிறப்பு இவருக்கு உண்டு.

குஷ்பூவிற்கு கோயில்

தமிழகத்தில் குஷ்பூவிற்கு கோயில் கட்டிய சம்பவமும் நடந்தது. மேலும் இட்லிக்கு குஷ்பூ இட்லி என பெயரிட்டு மகிழ்ந்தனர் ரசிகர்கள். சுந்தர் சியை திருமணம் செய்துக் கொண்டு தமிழ்நாட்டு மருமகளான குஷ்பூ, தொடர்ந்து தயாரிப்பாளராக பல படங்களை தயாரித்து வருகிறார்.

பன்முகம் காட்டும் குஷ்பூ

மேலும் சின்னத்திரையிலும் சீரியல் தயாரிப்பாளராகவும், ஷோக்களில் நடுவராகவும் இருந்து வருகிறார். சன் டிவியில் சீரியல்களை கொடுத்து வந்த இவர் சமீபத்தில் கலர்ஸ் தமிழ் சேனலில் மீரா என்ற தொடரை கொடுத்து ரசிகர்களை கவர்ந்தார். இந்தத் தொடரில் சுரேஷ் மேனனுடன் ஜோடி சேர்ந்து நடித்திருந்தார்.

பிரபலங்கள் வாழ்த்து

இதனிடையே இன்றைய தினம் தனது பிறந்தநாளை கொண்டாடிவரும் குஷ்பூவிற்கு கலா மாஸ்டர், பிரசன்னா, சதீஷ் உள்ளிட்ட சினிமா பிரபலங்களும் அரசியல் தலைவர்களும் சமூக வலைதளங்கள் மூலம் தங்களது வாழ்த்துக்களை பகிர்ந்துள்ளனர். அவர்கள் அனைவருக்கும் தனித்தனியாக நன்றி தெரிவித்து குஷ்பூ பதிலுக்கு கமெண்ட் தெரிவித்து வருகிறார்.

கமல்தான் பிடிக்கும்

இதனிடையே, குஷ்பூவின் பிறந்தநாளையொட்டி அவரது பழைய வீடியோ ஒன்று வைரலாகி வருகிறது. அதில் குஷ்பூவிடம் ரஜினி, கமல் இருவரில் யாரை பிடிக்கும் என்று கேள்வி கேட்கப்படுகிறது. உடனடியாக தயக்கம் இன்றி, கமலைத்தான் அதிகமாக பிடிக்கும் என்று பளீச்சென்று பதில் அளிக்கிறார் குஷ்பூ.