பிக்பாஸ் அல்டிமேட்...கமலுக்கு ஏற்பட்ட அதே நெருக்கடிகள் சிம்புவிற்கும் ஏற்படுமா ?

பிக்பாசை கைவிட்ட கமல்

பிக்பாஸ் ஐந்து சீசன்களைத் தொடர்ந்து, பிக்பாஸ் அல்டிமேட் நிகழ்ச்சியையும் தொகுத்து வழங்கி வந்தார் கமல். கொரோனாவால் பாதிக்கப்பட்டு மருத்துவமனையில் அனுமதிக்கப்பட்டிருந்த நிலையிலும் கூட, வீடியோ கான்ஃபிரன்சிங்கில் வந்து ரசிகர்கள், போட்டியாளர்களை சந்தித்தார். குணமாகி டிஸ்சார்ஜ் ஆனதும் நேராக பிக்பாஸ் செட்டிற்கு சென்று ஷுட்டிங்கில் கலந்து கொண்டார். மக்களை சந்திக்க கிடைக்கும் சிறிய வாய்ப்பையும் நான் தவற விட மாட்டேன் என சொன்னவர், திடீரென பிக்பாஸ் அல்டிமேட்டில் இருந்து விலகுவதாக கூறினார்.

கமல் விலக இது தான் காரணமா

தான் நடித்து வரும் விக்ரம் படத்தின் ஷுட்டிங் தொடர்ந்து தள்ளி போய், பாதிக்கப்பட்டு வருவதாகவும், தன்னுடைய தனிப்பட்ட காரணத்திற்காக மற்ற நடிகர், நடிகைகளின் வேலைகள் பாதிக்கப்பட கூடாது என்பதற்காக கனத்த இதயத்துடன் பிக்பாஸ் அல்டிமேட்டில் இருந்து விலகுவதாகவும், பிக்பாஸ் சீசன் 6 ல் வருவதாகவும் அறிக்கையில் குறிப்பிட்டிருந்தார். ஆனால் விக்ரம் படத்தின் ஓடிடி உரிமத்தை வாங்கி இருந்த ஹாட் ஸ்டார் கொடுத்த நெருக்கடி தான் கமல் விலக காரணம் என்றெல்லாம் பல விதமாக தகவல்கள் பரவின.

படங்களில் பிஸியாக இருக்கும் சிம்பு

இந்நிலையில் பிக்பாஸ் அல்டிமேட் நிகழ்ச்சியை இந்த வாரத்திலிருந்து சிம்பு தான் தொகுத்து வழங்குவார் என ஹார்ட்ஸ்டார் தமிழில் அதிகாரப்பூர்வமாக அறிவிக்கப்பட்டுள்ளது. மாநாடு படத்தை முடித்த பிறகு வெந்து தணிந்தது காடு, பத்து தல, கொரோனா குமார் என வரிசையாக பல படங்களில் கமிட்டாகி நடித்து வருகிறார் சிம்பு. இந்த படங்கள் தவிர இன்னும் சில படங்களுக்காகவும் சிம்புவுடன் பேசப்பட்டு வருகிறது. இந்நிலையில் பிக்பாஸ் அல்டிமேட் நிகழ்ச்சியை தொகுத்து வழங்குவதற்கும் சிம்பு ஒப்புக் கொண்டுள்ளார்.

சிம்புவிற்கும் நெருக்கடி வருமா

மற்ற படங்களின் வேலைகள் ஆரம்ப கட்டத்தில் இருக்கையில், விக்ரம் படத்தில் மட்டுமே நடித்து வரும் கமல், சினிமாவை காரணம் காட்டி பிக்பாஸ் அல்டிமேட்டில் இருந்து விலகி இருக்கிறார். ஆனால் சிம்பு ஒரே நேரத்தில் இரண்டு படங்களில் நடித்து வருகிறார். இதோடு அவர் பிக்பாஸிற்கு வந்திருப்பது அவருக்கு புதிய நெருக்கடியை தான் தரும். இந்த நெருக்கடிகள் பற்றி சிம்பு நிச்சயம் யோசித்திருப்பார். அப்படி இருந்தும் எப்படி இதற்கு ஒப்புக் கொண்டார் என பலர் ஆச்சரியமாக கேட்டு வருகிறார்கள். ஒருவேளை சிம்புவின் இதற்கான பதிலை, நிகழ்ச்சியின் போது சொல்லலாம் என எதிர்பார்க்கப்படுகிறது.