கேஜிஎஃப் 2 படம் பார்த்த கமல், இளையராஜா... என்ன சொல்லிருப்பாங்க ?

தரமான படம்

உலகம் முழுவதும் 10,000க்கும் அதிகமான தியேட்டர்களில், 5 மொழிகளில் கேஜிஎஃப் 2 படம் ரிலீஸ் செய்யப்பட்டது. இந்த படத்தை பிரபலங்கள், ரசிகர்கள் என அனைவரும் பாராட்டி, கொண்டாடி வருகின்றனர். திரைத்துறையை சேர்ந்த பலரே தரமான படம் என சர்டிஃபிகேட் கொடுத்துள்ளனர். கேஜிஎஃப் 2 டீம், பிரசாந்த் நீல், யாஷ் என அனைவருக்கு பாராட்டுக்கள் குவிந்து வருகிறது.

1000 கோடியை கடந்து விட்டதா

கேஜிஎஃப் 2 ரிலீசான 14 நாட்களில் உலகம் முழுவதும் 970 கோடிகளை வசூல் செய்துள்ளது. இன்று அல்லது நாளை 1000 கோடி வசூல் கிளப்பில் கேஜிஎஃப் 2 படமும் இணைய உள்ளது. ராஜமெளலி இயக்கிய ஆர்ஆர்ஆர் படம் 15 நாட்களில் 1000 கோடி வசூல் கிளப்பில் இணைந்தது. தற்போது கேஜிஎஃப் 2 அந்த சாதனையை முறியடிக்குமா என்பதை பார்க்க தான் அனைவரும் ஆர்வமாக காத்திருக்கிறார்கள். கேஜிஎஃப் 2 படம் இந்தியாவில் மட்டும் 736 கோடிகளை வசூல் செய்துள்ளது.

கேஜிஎஃப் 3 ஆரம்பிச்சுட்டாங்களா

மிக விரைவில் அதிக தொகையை வசூல் செய்துள்ள டாப் 5 இந்திய படங்களின் பட்டியலில் கேஜிஎஃப் 2 படமும் இணைந்துள்ளது. இந்நிலையில் கேஜிஎஃப் 3 படமும் இயக்க போவதாக பிரசாந்த் நீல் சமீபத்தில் அறிவித்தார். ஆனால் கேஜிஎஃப் 3 படத்தின் சில காட்சிகள் ஏற்கனவே எடுக்கப்பட்டு விட்டதாக படத்தின் ஹீரோவான யாஷ் சமீபத்தில் பேட்டி ஒன்றில் கூறி உள்ளார். அதனால் மிக விரைவிலேயே கேஜிஎஃப் 3 படமும் வரலாம் என எதிர்பார்க்கப்படுகிறது. கேஜிஎஃப் 2 படத்தில் ஸ்ரீநிதி ஷெட்டி இறந்து விடுவதை போல் காட்டப்படுவதால் கேஜிஎஃப் 3 ஹீரோயின் யாராக இருக்கலாம் என்ற கேள்வியும் எழுந்துள்ளது.

இளையராஜாவுடன் கேஜிஎஃப் 2 பார்த்த கமல்

இப்படி உலக ரசிகர்கள் கொண்டாடும் படமாக மாறி உள்ள கேஜிஎஃப் 2 படத்தை உலக நாயகன் கமல்ஹாசனும், இசைஞானி இளையராஜாவும் சேர்ந்து சென்று, இன்று சென்னையில் உள்ள தியேட்டர் ஒன்றில் பார்த்துள்ளனர். தியேட்டர் உரிமையாளர், இவர்கள் இருவரையும் பூங்கொத்து கொடுத்து வரவேற்ற போட்டோக்கள் சோஷியல் மீடியாவில் வெளியாகி உள்ளது.

கேஜிஎஃப் 2 க்கும் கமலுக்குமான தொடர்பு

கேஜிஎஃப் 2 படத்திற்கு ஸ்டண்ட் அமைத்துள்ள அன்பறிவு தான், கமல் தற்போது நடித்து முடித்துள்ள விக்ரம் படத்திற்கும் ஸ்டண்ட் அமைத்துள்ளனர். அதோடு, அனைவரும் பாராட்டும் கேஜிஎஃப் 2 படம் பற்றிய கமல் என்ன கமெண்ட்ஸ்/விமர்சனம் கொடுப்பார் என்பதை தெரிந்து கொள்ள அனைவரும் ஆர்வமாக உள்ளனர். சமீபத்தில் தான் கேஜிஎஃப் 2 படத்தை பார்த்து விட்டு நடிகர் ரஜினிகாந்த் பாராட்டி இருந்தார்.