தனது கதையில் தானே நடித்த கமல்...20 ஆண்டுகளை கடந்த ஆளவந்தான்

10 படங்களை முந்திய படம்

2001 ம் ஆண்டு தீபாவளியை முன்னிட்டு ஆளவந்தான் படம் ரிலீஸ் செய்யப்பட்டது. அந்த ஆண்டு தீபாவளிக்கு தமிழில் விஜய்யின் ஷாஜகான், விக்ரமின் காசி, விஜய்காந்த் நடித்த தவசி, மாதவன் நடித்த பார்த்தாலே பரவசம், டும்டும்டும் உள்ளிட்ட 10 படங்கள் ரிலீசாகின. கடும் போட்டிக்கு இடையில் பாக்ஸ்ஆபிசில் இடம்பிடித்தது கமலின் ஆளவந்தான். இந்த படம் ஒரே சமயத்தில் தமிழ், தெலுங்கு, இந்தி ஆகிய மொழிகளில் வெளியிடப்பட்டது.

தாயம் நாவலின் கதை

1984 ம் ஆண்டு கமல் எழுதிய தாயம் என்ற நாவலை அடிப்படையாகக் கொண்டது தான் ஆளவந்தான் படத்தின் கதை. பிறகு இந்த கதையை திரைகதையாக எழுதியதும் கமல் தான். ஆனால் இந்த படத்தை இயக்கும் வேலையை சுரேஷ் கிருஷ்ணாவிடம் கொடுத்தார் கமல்.

சிறந்த ஸ்பெஷல் எஃபெக்ட்ஸ்

மோஷன் கன்ட்ரோல் கேமிரா பயன்படுத்தி எடுக்கப்பட்ட முதல் இந்திய படம் ஆளவந்தான் தான். இந்த படத்தின் ஸ்பெஷல் எஃபெக்ட்ஸ் சிறப்பாக கையாளப்பட்டிருந்தது. இதற்காக இந்த படம் தேசிய விருதினை வென்றது. ஆஸ்திரேலிய கட்டிங் கிராஃபிக்ஸ் முறைகளும் இந்த படத்தில் கையாளப்பட்டன.

பிரம்மாண்ட ரிலீஸ்

கமல் இரட்டை வேடங்களில் நடித்த இந்த படம் 600 க்கும் மேற்பட்ட தியேட்டர்களில் திரையிடப்பட்டது. இந்த படத்தின் மூலம் ஒரே நாளில் அதிக தியேட்டர்களில் ரிலீஸ் செய்து, அதிக வசூலை பெறும் முறையை கமல் அறிமுகம் செய்து வைத்தார். ஆனால் இந்த படத்தின் இந்தி வெளியீட்டு உரிமம் மிகக் குறைந்த விலைக்கே விற்கப்பட்டது. இதனால் கமல் தனது சம்பளத்தை குறைத்துக் கொண்டு, தயாரிப்பாளருக்கு உதவினார்.

ஹாலிவுட்டிற்கு படத்திற்கு முன்னுதாரணம்

கமலின் ஆளவந்தான் படம், ஹாலிவுட் டைரக்டர் Quentin Tarantino, Kill Bill என்ற படத்தில் அனிமேடட் காட்சிகளை படமாக்க மிகப் பெரிய முன்னுதாரணமாக அமைந்தது. 2016 ல் அமெரிக்க திரைப்பட விழாவில் ஆளவந்தான் படம் திரையிடப்பட்டது. அமெரிக்கர்கள் பலரிடமும் பாராட்டை இந்த படம் பெற்றது.