புனித் ராஜ்குமாரின் நினைவுடன் நடந்த கேஜிஎஃப் 2 டிரைலர் வெளியீடு

புனித் ராஜ்குமாருக்கு நினைவஞ்சலி

ஏப்ரல் 14 ம் தேதி ரிலீசாக உள்ள கேஜிஎஃப் சாப்டர் 2 படத்தின் டிரைலர் வெளியீட்டு விழா பெங்களூருவில் இன்று மாலை நடைபெற்றது. படத்தில் நடித்த நடிகர், நடிகைகள் கலந்து கொண்ட இவ்விழாவில் சிறப்பு விருந்தினராக பாலிவுட் டைரக்டர் கரண் ஜோகர் கலந்து கொண்டார். முதலில் பேசிய கரண் ஜோகர், மறைந்த கன்னட சூப்பர் ஸ்டார் புனித் ராஜ்குமாரை நினைவு கூர்ந்தார்.

ஆக்ஷன் ஆரம்பம்

புனித் ராஜ்குமார் உண்மையான ஹீரோ என கூறி, அவரது சாதனைகள் பற்றி பேசிய கரண் ஜோகர், அவரது மறைவு இந்திய சினிமாவிற்கு பேரிழப்பு என்றார். பிறகு அனைவரையும் எழுந்து நின்று புனித் ராஜ்குமாருக்கு மெளன அஞ்சலி செலுத்தும்படி கேட்டுக் கொண்டார். புனித் ராஜ்குமாரை நினைவு கூறும் பாடலும் பாடப்பட்டது. தொடர்ந்து ஆக்ஷன் துவங்கியது என சொல்லி கேஜிஎஃப் 2 படத்தின் டிரைலர் வெளியிட்டார்.

கட்டிப்பிடித்து வாழ்த்திய பிரபலங்கள்

கன்னடம், தமிழ், தெலுங்கு, மலையாளம் ஆகியவற்றை தொடர்ந்து இந்தியிலும் டிரைலர் வெளியிடப்பட்டது. ரசிகர்களின் விசில் பறக்க, அரங்கம் அதிர, கேஜிஎஃப் 2 டிரைலர் திரையிடப்பட்டது. டிரைலரை பார்த்து விட்டு மாளவிகா, ரவீணா, ப்ருத்விராஜ் உள்ளிட்டோர் யாஷை கட்டிப்பிடித்து வாழ்த்து தெரிவித்தனர்.

இந்திய சினிமா மறக்க முடியாத படம்

கேரளாவில் கேஜிஎஃப் 2 படத்தை விநியோகம் செய்யும் உரிமத்தை பெற்றுள்ள நடிகர் ப்ருத்விராஜ், பாகுபலி 1 மற்றும் 2, கேஜிஎஃப் 1 மற்றும் 2 ஆகியன இந்திய சினிமாவால் மறக்க முடியாத படங்கள். எஸ்.எஸ்.ராஜமெளலியும், பிரஷாந்த் ஆகியோர் இந்திய சினிமா உலகின் தூண்கள் என பாராட்டினார்.