ஸ்ரீமந்துடு வெற்றி: இயக்குனருக்கு "ஆடி" காரை பரிசளித்து மகிழ்ந்த மகேஷ்பாபு

ஹைதராபாத்: ஸ்ரீமந்துடு படத்தின் மாபெரும் வெற்றி காரணமாக இயக்குநர் கொரட்டல சிவாவுக்கு ஆடி ஏ6 கார் ஒன்றைப் பரிசளித்து மகிழ்ந்திருக்கிறார் நடிகர் மகேஷ்பாபு.

மகேஷ்பாபு, சுருதிஹாசன் நடிப்பில் சமீபத்தில் வெளியான ஸ்ரீமந்துடு திரைப்படம் மாபெரும் வெற்றியைப் பெற்றது, குறிப்பாக பாக்ஸ் ஆபிசிலும் படம் வசூலில் பட்டையைக் கிளப்பியது.

மேலும் இந்தப் படத்தில் நடித்த மகேஷ்பாபு பலரின் பாராட்டுக்களையும் இந்தப் படத்தின் வாயிலாக பெற்றார். இதனால் மிகவும் மகிழ்ச்சியடைந்த மகேஷ்பாபு நேற்று இரவு திடீரென்று இயக்குநர் கொரட்டல சிவாவை தொடர்பு கொண்டு ஆடி ஷோரூமிற்கு வர சொன்னார்.

என்ன காரணம் என்று யோசித்துக் கொண்டே வந்த கொரட்டல சிவா மகேஷ்பாபு பரிசளித்த ஆடி காரைப் பார்த்ததும் மகிழ்ச்சியில் வாயடைத்து நின்று விட்டார்.

வெள்ளைக் கலரில் இருந்த அந்த ஆடி கார் மகேஷ்பாபுவின் அன்பையும் அவரது பெருந்தன்மையையும் படம்பிடித்துக் காட்டியதாக கொரட்டல சிவா நெகிழ்ந்து போயிருக்கிறார்.

இந்த பரிசளிப்பு நிகழ்வில் மகேஷ்பாபுவின் மனைவி நம்ரதா சிரோத்கரும் கலந்து கொண்டார். ஸ்ரீமந்துடு படத்தின் இணை தயாரிப்பாளர் மகேஷ்பாபு என்பது குறிப்பிடத்தக்கது.

இளவரசருக்கு தாராள மனசுதான்...