கோல்டன் குளோப் விருது...நாமினேஷனில் இடம் பிடித்த ஆர்.ஆர்.ஆர்... குவியும் வாழ்த்து !

இயக்குநர் ராஜமௌலி

பாகுபலி என்ற மகத்தான வெற்றிப்படத்தை கொடுத்த ராஜமௌலி, ஆர்.ஆர்.ஆர் என்ற படத்தை இயக்கி அனைவரையும் திரும்பி பார்க்க வைத்தார். இப்படத்தில் ராம் சரண்,ஜூனியர் என்டிஆர், அஜய் தேவன், ஆலியா பட், ஸ்ரேயா சரண் ஆகியோர் நடித்திருந்தனர். தமிழ்,தெலுங்கு, இந்தி,மலையாளம், கன்னடம் என பான் இந்திய திரைப்படமாக வெளியான இப்படம் வசூலை வாரிக்குவித்தது.

நண்பர்கள் பற்றிய கதை

சுதந்திரத்துக்காகப் போராடிய இரண்டு நண்பர்களைப் பற்றிய கதை தான் ஆர்.ஆர்.ஆர். இதில், அல்லுரி சீதாராம ராஜு என்ற ரோலில் ராம்சரணும், கொமாரம் பீம் என்ற வேடத்தில் ஜூனியர் என்டிஆரும் நடித்திருந்தார்கள். இருவருமே சிறந்த நடிகர்களாக இருந்த போதும், ஒருவருக்கொருவர் சளைத்தவர்கள் அல்ல என்று சொல்லும் அளவுக்கு இருவரின் நடிப்பும் உச்சுகொட்டவைத்தது.

கோல்டன் குளோப்

இந்நிலையில் இத்திரைப்படம் குளோப் விருது நாமினேஷனில் தேர்வாகி உள்ளது டோலிவுட் ரசிகர்களை மகிழ்ச்சியில் ஆழ்த்தி உள்ளது. திரைத்துறையின் உயரிய விருதாக கருதப்படும் ஆஸ்கர் விருதுக்கு அடுத்தபடியாக கோல்டன் குளோப் விருது விளங்குகிறது. இந்த விருது வழங்கும் விழா அடுத்த மாதம் ஜனவரி 10ந் தேதி அமெரிக்காவில் லாஸ் ஏஞ்சல்ஸ் நகரில் நடைபெற உள்ளது. இதில் சிறந்த நடிகர், நடிகை, ஆங்கிலம் அல்லாத படம் உள்ளிட்ட பிரிவுகளில் பரிந்துரை செய்யப்பட்ட 5 படங்களின் லிஸ்ட் வெளியாகி உள்ளது.

ரசிகர்கள் மகிழ்ச்சி

இதில், ராஜமௌலி இயக்கிய ஆர்ஆர்ஆர் திரைப்படம் ஆங்கிலம் மொழி இல்லாத படப்பிரிவிலும், நாட்டு நாட்டு பாடல் சிறந்த பாடல் பிரிவிலும் தேர்வாகி உள்ளது. ஜனவரி 10ந் தேதி நடைபெறும் விழாவில் ஆர்.ஆர்.ஆர் படம் விருதை பெறுமா?இல்லையா என்பது தெரியவரும். இதற்கு இசைப்புயல் ஏ.ஆர்.ரகுமான் டுவிட்டரில் வாழ்த்துக்களை தெரிவித்து உள்ளார்.