தொடர்ந்து வசூல்வேட்டையில் வலிமை... தமிழ்நாட்டுல மட்டுமே இவ்ளோ வசூலா?

அஜித்தின் வலிமை படம்

நடிகர் அஜித், ஹுமா குரேஷி, கார்த்திகேயா உள்ளிட்டவர்கள் லீட் கதாபாத்திரங்களில் நடித்து கடந்த மாதம் 24ம் தேதி வெளியான படம் வலிமை. இந்தப் படத்தை ஹெச் வினோத் இயக்கியிருக்க போனி கபூர் தயாரிப்பில் வெளியானது படம். கொரோனா உள்ளிட்ட காரணங்களால் படத்தின் ரிலீஸ் தொடர்ந்து தள்ளிப் போனது.

தொடர் வசூல்வேட்டை

பொங்கல் ரிலீசிலிருந்தும் விலகிய நிலையில், கடந்த வாரத்தில் படம் தமிழ், தெலுங்கு, கன்னடம் மற்றும் இந்தியில் ஒரே நேரத்தில் வெளியாகி ரசிகர்களுக்கு குஷியை கொடுத்தது. உலகெங்கிலும் 4000 திரையரங்குகளில் படம் ரிலீசான நிலையில், படம் தொடர்ந்து வசூல்வேட்டை நடத்தி வருகிறது.

கலவையான விமர்சனம்

படத்தின் சில விஷயங்களை விமர்சனம் செய்து, படம் இன்னும் சிறப்பாக அமைந்திருக்க வேண்டும் என்ற எதிர்பார்ப்பை விமர்சகர்கள் மட்டுமின்றி ரசிகர்களும் தெரிவித்திருந்தனர். ஒருசிலர் தீரன் அதிகாரம் ஒன்று படத்துடன் வலிமையை ஒப்பிட்டு, ஹெச் வினோத் ஏமாற்றி விட்டதாகவும் குறிப்பிட்டனர்.

தமிழகத்தில் ரூ.100 கோடி வசூல்

ஆனால் இதையெல்லாம் கடந்து ரசிகர்களின் விருப்பத்திற்குரிய படமாக வலிமை அமைந்துள்ளது. திரையிடப்பட்ட அரங்குகளில் எல்லாம் தொடர்ந்து வசூல் சாதனை நிகழ்த்தி வருகிறது. தமிழகத்தில் மட்டுமே 169 திரையரங்குகளில் திரையிடப்பட்ட நிலையில் ஒரே வாரத்தில் 100 கோடி ரூபாய் வசூலித்துள்ளது.

தொடர் வசூல்வேட்டை

மேலும் இந்திய அளவில் 122 கோடி வசூலையும் உலகளவில் 165 கோடியையும் வசூலித்துள்ளது. தொடர்ந்து நாளை மற்றும் நாளை மறுதினம் வார இறுதி நாட்களாக வரும் நிலையில் வலிமை படத்தின் வசூல் மேலும் அதிகரிக்கும் என்று எதிர்பார்க்கப்படுகிறது. இதனிடையே இந்தப் படம் வசூல்ரீதியாக வெற்றிப் பெற்றுள்ளதாக முன்னதாக படத்தின் தயாரிப்பாளர் போனி கபூர் தெரிவித்திருந்தது குறிப்பிடத்தக்கது.