‘வாரிசு‘ இசைவெளியீட்டு விழா..ரசிகர்கள் தள்ளுமுள்ளு..போலீஸாருக்கு காயம்..களேபரமான நேரு ஸ்டேடியம்!

ஹிட்டான பாடல்கள்

வாரிசு படத்திற்கு தமன் இசை அமைத்துள்ளார். இத்திரைப்படத்தில் இருந்து ரஞ்சிதமே...ரஞ்சிதமே பாடலும், தீ தளபதி, ஆராரிராரோ ஆகிய பாடல்கள் வெளியாகி ரசிகர்களிடையே நல்ல வரவேற்பு கிடைத்துள்ளது. இந்த பாடல்கள் இணையத்தில் மாஸ் காட்டி வருகின்றன.

வாரிசு இசைவெளியீட்டு விழா

இந்நிலையில்,வாரிசு திரைப்படத்தின் இசைவெளியீட்டு விழா, நேரு ஸ்டேடியத்தில் கோலாகலமாக தொடங்கி உள்ளது. இந்த விழாவில் விஜய்யின் அப்பா எஸ்.ஏ.சந்திரசேகர், அம்மா ஷோபனா, சரத்குமார், எஸ்.ஜே. சூர்யா அகியோர் கலந்துகொண்டுள்ளனர். மேலும், வாரிசு படத்தில் முக்கிய கதாபாத்திரத்தில் நடித்த நடிகர்கள் பலரும் இந்த நிகழ்ச்சியில் கலந்து கொண்டுள்னர்.

விஜய் என்ன பேசுவார்

மாஸ்டர் படத்தின் ஆடியோ வெளியீட்டுக்குப் பிறகு விஜய் எந்த நிகழ்ச்சிகளிலும் கலந்துகொள்ளவில்லை. பீஸ்ட் படம் வெளியான போதும் இசை வெளியீட்டு விழா நடைபெறவில்லை. இரண்டு வருடங்களுக்குப் பிறகு வாரிசு இசை விழாவில் விஜய் கலந்து கொள்வதால் இவர் என்ன பேச போகிறார் என்பதை எதிர்பார்த்து ரசிகர்கள் காத்திருக்கின்றனர்.

களேபரமான நேரு ஸ்டேடியம்

இந்நிலையில், வாரிசு இசைவெளியீட்டு விழாவிற்கு டிக்கெட்டுகள் இல்லாமல் நேரு உள்விளையாட்டு அரங்கத்திற்குள் நுழைய முயன்ற ரசிகர்களை போலீசார் தடுக்க முயன்ற போது தள்ளுமுள்ளு ஏற்பட்டது. இந்த மோதலில் காவல்துறையினர் சிலர் காயம் அடைந்தனர். இதையடுத்து, ரசிகர்களை விரட்டி அடித்து நேரு ஸ்டேடியத்தை பூட்டினர். இதனால், அந்த பகுதியே சிறிது நேரம் பரபரப்புடன் காணப்பட்டது.