சி.எம்., ஆகாத அந்த கிளைமேக்ஸ் காட்சி போதும்.. விஜய் சர்கார் எப்போவுமே நடக்கும்!

சர்கார்

சன் பிக்சர்ஸ் தயாரிப்பில் ஏ.ஆர். முருகதாஸ் இயக்கத்தில் விஜய், கீர்த்தி சுரேஷ், வரலக்‌ஷ்மி சரத்குமார், ராதாரவி, பழ. கருப்பையா, யோகி பாபு உள்ளிட்டோர் நடிப்பில் கடந்த ஆண்டு நவம்பர் 6ம் தேதி தீபாவளி பண்டிகையை முன்னிட்டு சர்கார் திரைப்படம் வெளியானது. மெர்சல் படத்தை தொடர்ந்து விஜய் நடித்த சர்கார் படத்திற்கும் இசைப்புயல் ஏ.ஆர். ரஹ்மான் இசையமைத்தார்.

49-பி

உங்க ஓட்ட உங்களுக்கு தெரியாம இன்னொருத்தன் கள்ளத்தனமா போட்டா, அதற்கு எதிராக 49-பி மூலம் முறையிட்டு, உங்களுக்கான ஓட்டுரிமையை நீங்கள் செலுத்தலாம் என்ற வாக்களிக்கும் பாடத்தை விஜய்யின் சர்கார் தமிழ் மக்களிடையே விதைத்தது. 49-பி குறித்த விசயத்தை சர்கார் படத்தில் வைத்த இடத்திலேயே இயக்குநர் ஏ.ஆர். முருகதாஸ் வெற்றியை பதிவு செய்துவிட்டார்.

வசூல் சர்கார்

சர்கார் திரைப்படம் தீபாவளியை முன்னிட்டு வெளியானது. விஜய்யின் சர்கார் படத்துடன் போட்டியாக வரும் என அறிவிக்கப்பட்ட அஜித்தின் விஸ்வாசம் மற்றும் சூர்யாவின் என்.ஜி.கே படங்கள் தள்ளிப்போன காரணத்தினால், தமிழ்நாட்டில் முதல் நாள் வசூலாக 30 கோடிக்கும் அதிக வசூலை சர்கார் ஈட்டியது. இந்த தீபாவளிக்கு கைதி படத்துடன் பிகில் ரிலீசானதால், பிகில் படத்தால் கூட சர்காரின் முதல் நாள் வசூலை வீழ்த்த முடியவில்லை.

சர்ச்சை

மக்களுக்கு இலவசமாக அரசு வழங்கிய மிக்சர், கிரைண்டர், டிவி என அனைத்தையும் தீயில் போட்டு கொளுத்தும் காட்சி, மற்றும் படத்தில் வரும் நம்பர் 1, நம்பர் 2 என நேரடியாக தமிழக அரசியலை குறிவைத்து சர்கார் படத்தில் இடம்பெற்ற பல காட்சிகளால் மிகப்பெரிய சர்ச்சை வெடித்தது. மெர்சல் படத்தில் ஜி.எஸ்.டி.,க்கு எதிராக விஜய் பேசி சர்ச்சை உருவானதை விட சர்கார் படத்திற்கு எழுந்த சர்ச்சை பல மடங்கு அதிகமாக இருந்தது.

ஒரு வருடம்

சர்கார் படத்தில் விஜய் ஒரு விரல் புரட்சி நடத்தி இன்றுடன் ஒரு வருடம் ஆகிறது. இதனை, இந்தியளவில் விஜய் ரசிகர்கள் டிரெண்ட் செய்து வருகின்றனர். 49-பி குறித்தும், சர்கார் படத்தில் நீக்கப்பட்ட முருகதாஸின் காட்சிகளையும் அதிகளவில் விஜய் ரசிகர்கள் அந்த ஹேஷ்டேகில் பதிவிட்டு வருகின்றனர். சர்கார் படத்தில் வில்லியாக நடித்த நடிகை வரலக்‌ஷ்மியும் சர்கார் ஒருவருட கொண்டாட்டம் குறித்து ட்விட்டரில் பதிவிட்டுள்ளார்.

தீபாவளி

லோகேஷ் கனகராஜ் இயக்கத்தில் விஜய் நடித்து வரும் தளபதி 64 படம், தமிழ் புத்தாண்டு கொண்டாட்டமாக ரிலீசாகும் என எதிர்பார்க்கப்படுகிறது. மெர்சல், சர்கார், பிகில் என ஹாட்ரிக் தீபாவளியை விஜய் ரசிகர்கள் தளபதி தீபாவளியாக கொண்டாடினர். ஆனால், அடுத்த தீபாவளிக்கு விஜய் படம் வெளியாகுமா என்பது சந்தேகம் தான்.