தனியே தன்னந்தனியே... 500 கோடி கிளப்பை அசால்ட்டா திறந்து வைத்த சல்மான் கான்

100 கோடி கிளப்

100 கோடியை வசூல் செய்யும் படங்களை 100 கோடி கிளப்பில் இணைத்து வைத்து அழகு பார்ப்பது பாலிவுட்டினர் வழக்கம். பாலிவுட்டில் முன்னணி நடிகையான தீபிகா படுகோனேவின் படங்கள் வரிசையாக 100 கோடிகளை குவித்ததால் 100 கோடிகளின் நாயகி என்ற செல்லப்பெயர் தீபிகாவுக்கு உண்டு.

சல்மான் கான்

49 வயதாகும் சல்மான் கானின் படங்களுக்கு ரசிகர்கள் மத்தியில் ஒரு தனி மரியாதை எப்பொழுதும் உண்டு. இவர் நடிப்பில் வெளிவந்த பல படங்கள் சர்வசாதாரணமாக 100 கோடி பட்டியலில் இடம்பிடித்து வந்தது.

300 கோடி

எத்தனை நாட்களுக்கு 100 கோடி பட்டியலில் இருப்பது என்று நினைத்தாரோ என்னவோ தனது அடுத்தடுத்த படங்களான ஏக் தா டைகர், கிக், தபாங் 2 மற்றும் ஜெய் கோ போன்ற படங்களின் மூலமாக 300 கோடி கிளப் என்ற ஒன்றை தனி ஆளாக சல்மான் உருவாக்கினார்.

மாற்றம் முன்னேற்றம்

மாற்றம் முன்னேற்றம் என்பது போல அடுத்ததாக 500 கோடி கிளப் ஒன்றைத் திறந்து வைத்திருக்கிறார் சல்மான் கான். இவரின் நடிப்பில் இந்த வருடம் வெளியான பஜ்ரங்கி பைஜான் திரைப்படம் 500 கோடிப் பட்டியலில் இணைந்தது. அடுத்ததாக இவரின் நடிப்பில் சமீபத்தில் வெளியான பிரேம் ரத்தன் தன் பாயோ திரைப்படம் தற்போது 500 கோடிப் பட்டியலில் இணையக் காத்திருக்கிறது.

தனியே தன்னந்தனியே

எது எப்படியோ ஒரே வருடத்தில் 2 படங்கள் அடுத்தடுத்து 500 கோடியை வசூலிப்பதன் மூலம் பாலிவுட் ஏன் ஒட்டுமொத்த இந்தியத் திரையுலகிலும் 500 கோடி கிளப்பை திறந்து வைத்த பெருமைக்குரியவராக சல்மான் கான் மாறுவது மட்டும் உறுதி.