சமந்தாவை பாதித்த Myositis.. மூச்சுக் கூட சரியா விட முடியாதாம் .. என்ன என்ன பிரச்சனை வரும் தெரியுமா?

முடியாத நிலையிலும் டப்பிங்

தி ஃபேமிலி மேன் படத்தில் புரட்சிகர பெண்ணாக நடித்து ஆக்‌ஷனில் பட்டையை கிளப்பி இருந்தார் நடிகை சமந்தா. சமீபத்தில் வெளியான யசோதா படத்தின் டிரைலரிலும் ஏகப்பட்ட ஆக்‌ஷன் காட்சிகளில் நடித்து மிரட்டி உள்ளார். மயோசிடிஸ் நோயால் பாதிக்கப்பட்டுள்ள சமந்தா கையில் ட்ரிப்ஸ் ஏற்றிக் கொண்டே யசோதா படத்திற்கான டப்பிங்கை செய்யும் போட்டோவை வெளியிட்டு தான் எந்தளவுக்கு ஒரு போல்டான பெண் என்பதை ரசிகர்களுக்கு நிரூபித்துள்ளார்.

மயோசிடிஸ் என்றால் என்ன

மயோசிடிஸ் என்றால் தசை அழற்சி நோய் எனப்படுகிறது. இது ஒருவகை அரிதான நோய் என்கின்றனர். பொதுவாக இந்த நோய் எந்த பாலினத்துக்கும், எந்த வயதுடையவருக்கும் வரும் என்கின்றனர். தசை பலவீனம், நடை பயிற்சி செய்யும் போது ரொம்ப சோர்வு ஏற்படுவது, சாப்பிடும் போது விழுங்கவே முடியாத பிரச்சனைகள் தான் இந்த நோய்க்கான முதல் அறிகுறிகள் என மருத்துவர்கள் தெரிவித்துள்ளனர்.

சமந்தாவை காணோம்

கடந்த 3 மாதங்களாக நடிகை சமந்தா சோஷியல் மீடியாவில் புதிதாக போட்டோக்களை போடவில்லையே, என்ன காரணத்திற்காக தலைமறைவாகி விட்டார் என ஏகப்பட்ட ட்ரோல்கள் பறந்தன. நெகட்டிவிட்டி காரணமாக சோஷியல் மீடியாவை விட்டே நிரந்தரமாக சமந்தா விலகி விட்டார் என்றும் கூறப்பட்டன. ஆனால், இப்படியொரு நோயால் தான் கடந்த மூன்று மாதங்களாக அவதி பட்டு வந்திருக்கிறார் சமந்தா என்பதை அறிந்த ரசிகர்கள் அவர் சீக்கிரமே குணமடைய வேண்டும் என பிரார்த்தனை செய்து வருகின்றனர்.

மூச்சு விடக் கூட சிரமம்

மயோசிடிஸ் நோய் பல வகைகளாக பிரிக்கப்படுகிறது. இதில், நடிகை சமந்தா எந்த வகை மயோசிடிஸ் நோயால் பாதிக்கப்பட்டுள்ளார் என்பதை குறிப்பிடவில்லை. பொதுவாகவே மயோசிடிஸ் நோயால் பாதிக்கப்பட்டவர்களால், சேரில் இருந்து எழுந்து நடக்க முடியாது என்றும், மாடிப் படி ஏறுவதில் சிரமம் உண்டாகும் என்றும், மூச்சு விடவே பெரிய கஷ்டமாக இருக்கும் என்றும் உடல் ரொம்பவே சோர்வாக இருக்கும் என்றும் கூறுகின்றனர்.

சரி செய்யலாம்

மயோசிடிஸ் நோயால் அமெரிக்கர்கள் தான் அதிகப்படியாக பாதிக்கப்பட்டு வருகின்றனர் என சில ஆய்வுகள் தெரிவித்துள்ளன. அரிய நோயாக இருந்தாலும் இதை குணப்படுத்த முடியும். சரியான மருத்துவ சிகிச்சையை செய்து வந்தால், சில மாதங்களில் பூரண குணம் பெறலாம் என்கின்றனர். ஆனால், முறையான சிகிச்சை எடுக்கவில்லை என்றால் காலத்துக்கும் சக்கர நாற்காலியில் கிடக்க வேண்டிய அபாயமும் உண்டாகும் என்றும் மருத்துவர்கள் எச்சரிக்கின்றனர். நடிகை சமந்தா விரைவில் முழுமையாக குணமாகி வருவார், அதற்கான மனோபலம் அவரிடம் உள்ளது என்பது குறிப்பிடத்தக்கது.