அந்த பிரச்சனை.. டாக்டர் ஸ்ட்ரேஞ்ச் படத்திற்கு வந்த சிக்கல்.. இந்த நாட்டில் படம் ரிலீஸ் ஆகாதாம்!

மார்வெலின் அடுத்த பிரம்மாண்டம்

ஸ்பைடர்மேன் நோ வே ஹோம் திரைப்படம் மூலம் பாக்ஸ் ஆபிஸ் வசூலை உலகளவில் வாரிக் குவித்த மார்வெல் தயாரிப்பு நிறுவனம் தனது அடுத்த பிரம்மாண்ட படமான டாக்டர் ஸ்ட்ரேஞ்ச் இன் தி மல்டிவெர்ஸ் ஆஃப் மேட்னஸ் படத்தை வரும் மே 6ம் தேதி உலகம் முழுவதும் ரிலீஸ் செய்கிறது. இந்த படத்திற்கு உலகம் முழுவதும் மிகப்பெரிய வரவேற்பு எழுந்துள்ளது.

டிக்கெட் புக்கிங் துவக்கம்

சென்னையில் உள்ள ரோகிணி திரையரங்கில் அதிகாலை 4 மணி காட்சிக்கான டிக்கெட் புக்கிங் தற்போது துவங்கி உள்ளதாக அதன் நிர்வாகம் அதிகாரப்பூர்வமாக அதிகரித்துள்ளது. கிட்டத்தட்ட 2 வாரங்களுக்கு முன்னதாகவே ஒரு ஹாலிவுட் படத்திற்கு தமிழ்நாட்டில் இப்பவே புக்கிங் ஆரம்பிக்கும் அளவுக்கு அத்தனை பெரிய எதிர்பார்ப்பு இந்த படத்திற்கு எழுந்துள்ளது.

வசூல் வேட்டை தான்

வலிமை, எதற்கும் துணிந்தவன், பீஸ்ட் என கோலிவுட் படங்கள் மூலமாகவும் ஆர்ஆர்ஆர், கேஜிஎஃப் 2 போன்ற பிற மாநில படங்கள் மூலமாகவும் தமிழ்நாடு திரையரங்குகள் தொடர்ந்து வசூல் வேட்டை நடத்தி வருகின்றன. இந்நிலையில், அடுத்ததாக மார்வெல் திரைப்படமான டாக்டர் ஸ்ட்ரேஞ்ச் வெளியானால் இன்னமும் வசூல் வேட்டை தான்.

சவுதி அரேபியாவில் தடை

ஆனால், இந்த வசூல் எல்லாம் எங்களுக்குத் தேவையில்லை என்றும் எங்களின் கொள்கைகளில் உறுதியாக நிற்போம் என சவுதி அரேபியா அரசு இந்த படத்தின் வெளியீட்டுக்கு தற்போது தடை விதித்துள்ளது. சவுதி அரேபியா அரசின் தணிக்கை குழுவுக்கு படம் தணிக்கைக்கு சென்ற நிலையில், 'கே' சூப்பர் ஹீரோ கதாபாத்திரம் இருப்பதால் படத்திற்கு தணிக்கை சான்றிதழ் வழங்க மறுத்து விட்டது. இதனால், சவுதி அரேபியா மட்டுமின்றி அரபு நாடுகளில் படம் ரிலீஸ் ஆக வாய்ப்பில்லை.

ஓரினச்சேர்க்கையாளர் கதாபாத்திரம்

இயக்குநர் சாம் ரைமி இயக்கத்தில் பிரபல ஹாலிவுட் நடிகர் பெனடிக்ட் கம்பர்பேட்ச் நடிப்பில் உருவாகி உள்ள டாக்டர் ஸ்ட்ரேஞ்ச் இன் தி மல்டிவெர்ஸ் ஆஃப் மேட்னஸ் படத்தில் இடம்பெற்றுள்ள புதிய சூப்பர் ஹீரோவான அமெரிக்கா சாவேஸ் ஓரினச்சேர்க்கையாளர் கதாபாத்திரம் என்பதால் தான் இந்த தடை விதிக்கப்பட்டுள்ளது. அந்த கதாபாத்திரத்தில் ஹாலிவுட் நடிகர் Xochitl Gomez நடித்துள்ளார்.