சீனாவைத் தொடர்ந்து ஜப்பானிற்கு செல்லும் பிகே

சென்னை: கடவுள் மறுப்புக் கொளகைகளை மையமாகக் கொண்டு எடுக்கப்பட்ட பிகே திரைப்படம் இந்தியாவில் மாபெரும் அதிர்வலைகளை ஏற்படுத்தியது. ராஜ்குமார் ஹிரானி இயக்கத்தில் அமீர்கான் மற்றும் அனுஷ்கா ஷர்மா நடிப்பில் கடந்த ஆண்டு இந்தியில் வெளிவந்தது பிகே.

ஒருபக்கம் படத்திற்கு எதிர்ப்புகள் எழுந்தாலும், மறுபக்கம் நல்ல விமர்சனங்கள் படத்திற்கு கைகொடுத்ததில் வசூலில் மாபெரும் சாதனை படைத்தது பிகே. இந்தியாவில் மட்டும் சுமார் 300 கோடியை வசூலித்து சாதனை படைத்தது.

படத்தின் வெற்றியால் சீனாவில் உள்ள தியேட்டர்களிலும் கடந்த மாதம் இந்தப் படத்தை திரையிட்டனர் பிகே படக்குழுவினர், சீனாவில் 100 கோடியை வசூலித்து அங்கும் சாதனை புரிந்தது பிகே.

சீனாவின் வெற்றியைத் தொடர்ந்து தற்போது அடுத்தகட்டமாக ஜப்பானிலும் பிகே படத்தைத் திரையிடப் போகின்றனர். இந்தத் தகவலை படத்தின் இயக்குநர் ராஜ்குமார் ஹிரானி உறுதிப்படுத்தி உள்ளார்.

இன்னும் 5 மாதங்கள் கழித்து டிசம்பர் மாதம் 19 ம் தேதி ஜப்பானில் வெளியாக இருக்கின்றது பிகே, ஏற்கனவே அமீரின் 3 இடியட்ஸ் ஜப்பானில் வெளியாகி வெற்றி பெற்றது குறிப்பிடத்தக்கது.