அஜீத்துடன் அசத்தலான பர்ஸ்ட் லுக்குடன் வெளியானது "வேதாளம்"

தல 56

என்னை அறிந்தால் படத்திற்குப் பின்பு அஜீத் நடிப்பில் சிறுத்தை சிவா இயக்கத்தில் உருவாகியிருக்கும் திரைப்படம் தல 56. கிட்டத்தட்ட படத்தின் மொத்த படப்பிடிப்பும் முடிவடைந்தும் கூட படத்தின் தலைப்பை நீண்ட நாட்களாக அறிவிக்காமலே இருந்தனர் படக்குழுவினர்.

ஏமாற்றம்

சில தினங்களுக்கு முன்பு கூட நண்பகல் ஒரு மணிக்கு படத்தின் தலைப்பு வெளியாகும் என்று அறிவித்து பின்பு அறிவிக்காமல் விட்டுவிட்டனர். இதனால் அஜீத் ரசிகர்கள் மிகுந்த ஏமாற்றம் அடைந்தனர்.

தலைப்பு + பர்ஸ்ட் லுக்

அஜீத் ரசிகர்களுக்கு மேலும் மகிழ்ச்சி தரும் விதமாக படத்தின் தலைப்புடன் பர்ஸ்ட் லுக்கும் இன்று வெளியாகும் என்று சுரேஷ் சந்திரா ஏற்கனவே அறிவித்து இருந்தார். அதன்படி சற்று முன்பு படத்தின் தலைப்பு மற்றும் பர்ஸ்ட் லுக்கை தனது ட்விட்டர் பக்கத்தில் அதிகாரப்பூர்வமாக அறிவித்தார் சுரேஷ் சந்திரா.இதனால் தற்போது டபுள் உற்சாகத்துடன் கொண்டாட்டங்களில் ஈடுபட்டு வருகின்றனர் அஜீத் ரசிகர்கள்.

சிவப்புக் கலர் சட்டை

சிவப்புக் கலர் சட்டையில் காதில் கடுக்கன், விரல்களில் மோதிரங்கள், கைகளில் சங்கிலி மற்றும் ஒரு கையில் கூலிங்கிளாஸ் வைத்துக் கொண்டு ஷார்ப்பாக பார்ப்பது போன்று அஜீத்தின் லுக் உள்ளது. பர்ஸ்ட் லுக்கில் அஜீத் மிகவும் ஸ்டைலிஷாக இருக்கிறார், மேலும் கைகளில் வளையங்கள், மணிக்கட்டில் கயிறு என்று வித்தியாசமாக காட்சியளிக்கிறார் அஜீத்.

இந்தியளவில்

சுரேஷ் சந்திராவின் இந்த அறிவிப்பால் அஜீத் ரசிகர்கள் மிகுந்த மகிழ்ச்சியடைந்துள்ளனர். தற்போது படத்தின் தலைப்பை #vedhalamஎன்ற ஹெஷ்டேக் போட்டு ட்விட்டரில் கொண்டாடி வருகின்றனர் அஜீத் ரசிகர்கள். இந்தியளவில் அஜீத் படத்தின் தலைப்பும், சென்னை ட்விட்டர் மேப்பில் சுரேஷ் சந்திரா பெயரும் தற்போது ட்விட்டரில் ட்ரெண்டடித்துக் கொண்டிருக்கிறது.

உலகளவில்

தலைப்பு அறிவிக்கப்பட்ட சில மணித் துளிகளிலேயே இந்தியளவில் ட்விட்டரில் ட்ரெண்டான படத்தின் தலைப்பு தற்போது உலகளவில் ட்ரெண்டடித்துக் கொண்டிருக்கிறது.

அஜீத் ரசிகர்களின் தல தீபாவளி ஆரம்பம்.....