இதைத்தான் சொல்லியிருந்தாரோ? பயோபிக்கில், சில்க் ஸ்மிதாவாக நடிக்கும் பிரபல ஹீரோயின் இவர்தான்!

சில்க் இல்லாத படங்கள்

1980 முதல் 1990 வரை சில்க் ஸ்மிதா இல்லாத படங்கள் குறைவு. அனைத்து மொழிகளில் அவருக்கென ரசிகர்கள் இருந்தார்கள். ரஜினி, கமல் தொடங்கி பல முன்னணி நடிகர்கள் படங்களில் நடித்துள்ளார். இவர் கடந்த 1996 ஆம் ஆண்டு மரணமடைந்தார்.

வித்யாவுக்கு விருது

சில்க் ஸ்மிதாவின் வாழ்க்கை கதையைத் தழுவி பாலிவுட்டில் டர்ட்டி பிக்சர் என்ற பெயரில் சினிமா உருவானது. இதில் வித்யா பாலன், சில்க் ஸ்மிதா கேரக்டரில் நடித்தார். இதில் நடித்ததற்காக வித்யா பாலனுக்கு தேசிய விருது கிடைத்தது. மலையாளத்திலும் சில்க்கின் கதையை மையப்படுத்தி படங்கள் வெளியாகின.

முடியாமல் போனது

நடிகர் வினு சக்கரவர்த்தி அவர் வாழ்க்கை கதையை படமாக்க நினைத்தார். ஆனால், அது முடியாமல் போய்விட்டது. இந்நிலையில் சில்க் ஸ்மிதாவின் வாழ்க்கைக் கதையை கொண்டு மேலும் ஒரு படம் தயாரிக்கப்படுகிறது. இதற்கு 'அவள் அப்படித்தான்' என்ற டைட்டில் வைத்துள்ளனர். காயத்ரி பிலிம்ஸ் சித்ரா லட்சுமணனும் முரளி சினி ஆர்ட்ஸ் எச். முரளியும் இணைந்து தயாரிக்கின்றனர்.

தெலுங்கு நடிகை

விளம்பரப் படங்களை இயக்கியவரும், சந்தானம் நடித்த 'கண்ணா லட்டு தின்ன ஆசையா' படத்தை இயக்கியவருமான கே.எஸ்.மணிகண்டன் இயக்குகிறார். இதில் சில்க் ஸ்மிதாவாக நடிக்க பல நடிகைகளை தேடி வந்தனர். இந்நிலையில் தெலுங்கு நடிகை அனசுயா பரத்வாஜ் நடிப்பது உறுதியாகி இருக்கிறது.

அனசுயா பரத்வாஜ்

ரங்கஸ்தலம் படத்தில் நடித்ததற்காக விருதுபெற்றுள்ள அனசுயா, தெலுங்கில் டிவி நிகழ்ச்சிகளையும் தொகுத்து வழங்கி வருகிறார். இவர் சமீபத்தில் விஜய் சேதுபதியின் அருகில் நிற்கும் புகைப்படத்தை இன்ஸ்டாவில் பதிவிட்டு, புதிய தொடக்கம்.. கோலிவுட் என்று கூறியிருந்தார் என்பது குறிப்பிடத்தக்கது.