The best find of the Bigg Boss 6: தனலட்சுமி வெற்றியாளர்... ஷிவின் புரட்சியாளர்... சொன்னது யாரு?

இறுதிக் கட்டத்தில் பிக் பாஸ்

பிக் பாஸ் சீசன் 6 டைட்டில் வின்னர் யார் என்ற எதிர்பார்ப்பில் விக்ரமன், அசீம் இடையே கடும் போட்டி காணப்படுகிறது. கடந்த சில தினங்களாகவே பிக் பாஸ் ஹீரோ விக்ரமன், டைட்டில் வின்னர் அசீம் என்ற ஹேஷ்டேக்குகள் டிவிட்டரில் ட்ரெண்டாகி வருகின்றன. இவர்களுக்குப் பின்னர் ஷிவின், அமுதவாணன் ஆகியோர் மீதும் அதிக எதிர்பார்ப்பு எழுந்துள்ளது. ஆனாலும் பிக் பாஸ் ரசிகர்கள் பலரும் விக்ரமனுக்கே சப்போர்ட் செய்து வருகின்றனர்.

கவனம் ஈர்த்த ஷிவின்

21 போட்டியாளர்கள் கலந்துகொண்ட இந்த சீசனில் ஷிவினும் ஒருவர் என்பது குறிப்பிடத்தக்கது. திருநங்கையான ஷிவின் பிக் பாஸ் வீட்டுக்குள் அடியெடுத்து வைத்த முதல் ஓரிரு வாரங்கள் வரை அங்கிருக்கும் சூழலை புரிந்துகொள்ள முடியாமல் தடுமாறினார். அதேபோல் பெரும்பாலான ஹவுஸ் மேட்ஸ்களும் ஷிவினிடம் இருந்து கொஞ்சம் விலகியே இருந்ததை பார்க்க முடிந்தது. மேலும் சில போட்டிகளின் போது நேரடியாகவும் மறைமுகமாகவும் ஷிவின் அவரது பாலினத்தை பின்னணியாக வைத்து கேலி கிண்டல் செய்யப்பட்டார். அவை எல்லாவற்றையும் கடந்து 100 நாட்கள் பிக் பாஸ் வீட்டில் இருந்து சாதனைப் படைத்துள்ளார் ஷிவின்.

இந்த சீசனின் சிறந்த கண்டுபிடிப்பு

20 போட்டியாளர்களும் தனித்தனியாக விளையாட ஷிவின் மட்டும் ஒரு சமூகத்தின் உரையாடலாக இந்த பிக் பாஸ் சீசனில் தொடர்ந்தார். காலங்காலமாக புறக்கணிக்கப்படும் திருநங்கை சமூகத்தில் இருந்து வந்த ஷிவின், தனக்கு கிடைத்த வாய்பை சரியாக பயன்படுத்தியுள்ளதாக தெரிகிறது. முன்னதாக இன்றைய தினத்தின் இரண்டாவது ப்ரோமோவில், பிக் பாஸ் வீட்டில் யாருக்கு நன்றி சொல்ல வேண்டும் என கமல்ஹாசன் கேட்டதற்கு பலரும் ஷிவினை குறிப்பிட்டனர். அதனையடுத்து வெளியான மூன்றாவது ப்ரோமோவில் யார் பிக் பாஸ் சீசன் 6ன் சிறந்த கண்டுபிடிப்பு என ஹவுஸ் மேட்ஸ்களிடம் கேட்கப்பட்டது.

இதுவே பெரிய புரட்சி

அப்போது மைனா, அசீம் இருவரும் தனலட்சுமியை குறிப்பிடுகின்றனர். எந்தவொரு மீடியா வெளிச்சமும் இல்லாமல் இவ்வளவு தூரம் வந்தது பெரிய விசயம் என பாராட்டினர். அடுத்து பதிலளிக்கும் ராம், சாந்தி, விக்ரமன் உள்ளிட்டோர் ஷிவின் தான் சிறந்த கண்டுபிடிப்பு என்ற பட்டம் கொடுக்கின்றனர். இதை பெரிய புரட்சியாகப் பார்க்கிறேன், பேசுவதை விட வாழ்ந்து காட்டுவது கடினம். அதனை ஷிவின் செய்துள்ளார் என விக்ரமன் கூறுகிறார். அவரின் இந்த கருத்தை ரசிகர்களும் ஏற்றுக்கொண்டுள்ளனர். ஷிவின் நிச்சயம் அதற்கு தகுதியானவர் என்று ரசிகர்களும் கமெண்ட்ஸ் செய்து வருகின்றனர்.