முகப்பு

செய்திகள்

சென்னை: கலவையான விமர்சனங்கள் வந்தாலும் கூட முதல்நாளில் 6 கோடிகளுக்கும் அதிகமாக வசூலித்து சாதனை புரிந்திருக்கிறது, விக்ரமின் 10 என்றதுக்குள்ள.

விக்ரம், சமந்தா, பசுபதி, மனோபாலா ஆகியோரின் நடிப்பில் நேற்று வெளியான படம் 10 என்றதுக்குள்ள. ஐ படத்திற்குப் பின்னர் நீண்ட இடைவெளி கழித்து விக்ரமின் நடிப்பில் வெளியாகியிருக்கும் படம், ஏ.ஆர்.முருகதாஸின் தயாரிப்பு, விஜய் மில்டனின் இயக்கம் என்று இத்தனை அம்சங்கள் இருந்தும் படம் ரசிகர்களின் எதிர்பார்ப்பை பூர்த்தி செய்யத் தவறி விட்டது என்று கூறுகின்றனர்.

ஆயுத பூஜை தினத்தில் வெளியான இப்படத்திற்கு முன்பதிவு நன்றாக இருந்ததால் நேற்று வெளியான இப்படம் இந்தியா முழுவதும் சுமார் 6.5 கோடியை வசூலித்து இருக்கிறது.

தமிழ்நாட்டில் 5 கோடியை வசூலித்து இருக்கும் இப்படம் மற்ற மாநிலங்களில் சுமார் 1.5 கோடியை வசூலித்து இருக்கிறது. மொத்தமாக இந்தியா முழுவதும் நேற்று 6.5 கோடியை வசூலித்திருக்கிறது.

எதிர்மறை விமர்சனங்கள் இருந்தாலும் அடுத்தடுத்த 4 தினங்கள் விடுமுறை என்பதால், வரும் நாட்களில் படத்தின் வசூல் குறையாமலிருக்கும் என்று திரையரங்க வட்டாரங்கள் நம்பிக்கை தெரிவிக்கின்றன.

ரூ 40 கோடி செலவில் எடுக்கப்பட்ட 10 என்றதுக்குள்ள போட்ட பணத்தை வசூலிக்குமா? என்பதை பொறுத்திருந்து பார்க்கலாம்.