சுந்தர் சி இயக்கியுள்ள காஃபி வித் காதல் படத்தை வெளியிடும் ரெட் ஜெயன்ட்ஸ்: ரிலீஸ் தேதியுடன் அப்டேட்

காத்திருக்கும் காமெடித் திருவிழா

தமிழ் சினிமாவில் காமெடியான ஜானரில் படங்களை இயக்கி பிரபலமானவர் சுந்தர் சி. இயக்குநராக கலக்கி வந்த சுந்தர் சி, சில வருடங்களாக நடிப்பிலும் கவனம் செலுத்தி வருகிறார். கடைசியாக அவர் இயக்கிய படங்களான அரண்மனையும் அதன் மூன்று பாகங்களும், ஹாரர் திரில்லர் பின்னணியில் உருவாகியிருந்தது. இந்நிலையில், தற்போது சுந்தர் சி இயக்கியுள்ள 'காஃபி வித் காதல்', மூலம் மீண்டும் காமெடி ரூட்டுக்கே திரும்பியுள்ளார்.

கலக்கல் கூட்டணியில் காஃபி வித் காதல்

ஜீவா, ஜெய், ஸ்ரீகாந்த், மாளவிகா ஷர்மா, அம்ரிதா, யோகி பாபு, டிடி உள்ளிட்ட பலர் நடித்துள்ள இந்தப் படத்திற்கு யுவன் சங்கர் ராஜா இசையமைத்துள்ளார். இந்தப் படம் முழுக்க முழுக்க நகைச்சுவைப் பின்னணியில் ரகளையாக உருவாகியுள்ளதாகக் கூறப்படுகிறது. இதனால், காஃபி வித் காதல் படம் மீதான எதிர்பார்ப்பு நாளுக்கு நாள் அதிகரித்துக் கொண்டே இருக்கிறது. இந்நிலையில், இந்தப் படத்தின் ரிலீஸ் தேதி குறித்து அதிகாரப்பூர்வ அறிவிப்பு வெளியாகியுள்ளது.

உதயநிதியின் ரெட் ஜெயன்ட் வெளியீடு

தமிழில் தற்போது பெரும்பாலான திரைப்படங்களை உதயநிதியின் ரெட் ஜெயன்ட் நிறுவனம் தான் வெளியிடுகிறது. அந்த வரிசையில் காஃபி வித் காதல் படத்தையும், ரெட் ஜெயன்ட் நிறுவனம் கைப்பற்றியுள்ளது. இதனை அந்நிறுவனமே தங்களது ட்விட்டர் பக்கத்தில் அதிகாரப்பூர்வமாக அறிவித்துள்ளது. இதனையடுத்து காஃபி வித் காதல் படக்குழுவினர், பட ப்ரோமோஷன் வேலைகளில் தீவிரமாக களமிறங்கியுள்ளனர்.

அக்டோபர் மாதம் ரிலீஸ்

இந்நிலையில், காஃபி வித் காதல் படத்தை கைப்பற்றியுள்ள ரெட் ஜெயன்ட், படத்தின் ரிலீஸ் தேதியை அறிவித்துள்ளது. அதன்படி, இந்தத் திரைப்படம் அக்டோபர் மாதம் 7ம் தேதி திரையரங்குகளில் வெளியாகிறது. செப்டம்பர் 30ம் தேதி பொன்னியின் செல்வன் வெளியாகிறது. அதேபோல், தனுஷின் நானே வருவேன் இம்மாத இறுதியில் ரிலீஸாகும் என எதிர்பார்க்கப்படுகிறது. இதனிடையே காஃபி வித் காதல் ரிலீஸ் தேதி குறித்தும் அறிவிப்பு வெளியாகியுள்ளது.