ஏழு ஆண்டுகள் கழித்து தனுஷ்-அனிருத்... அதே கூட்டணியில் வரும் முதல் சிங்கிள்

அனிருத்தின் அறிமுகம்

ஐஸ்வர்யா தனுஷ் தனது முதல் படத்தை டைரக்ட் செய்ய நினைத்த போது யுவன் ஷங்கர் ராஜாவைத்தான் இசையமைப்பாளராக தேர்வு செய்தாராம். ஆனால் அனிருத் மீது தனுஷ் அதிக நம்பிக்கை வைத்து அவருடைய அறிவுரையின் பேரில்தான் "3" படத்திற்கு அனிருத் இசையமைக்க ஒப்பந்தமானார் என்று ஐஸ்வர்யா முன்னதாக கூறியுள்ளார்.

DnA கூட்டணி

தனுஷ் நடித்த படங்கள் மட்டுமல்லாது, அவரது தயாரிப்பில் வந்த படங்களான எதிர் நீச்சல், காக்கிச் சட்டை, நானும் ரவுடிதான் போன்ற படங்களுக்கும் அனிருத்தான் இசையமைத்தார். ஆனால் வெளி வராத காரணத்தினால் தங்க மகன் திரைப்படத்திற்கு பிறகு இவர்கள் ஒன்றாக பணி புரியவில்லை. இப்போதுஏழு ஆண்டுகள் கழித்து இந்தக் கூட்டணி இணைந்துள்ளதால் பெரும் எதிர்ப்பார்ப்பு உண்டாகியுள்ளது.

திருச்சிற்றம்பலம்

யாரடி நீ மோகினி, குட்டி, உத்தம புத்திரன் திரைப்படங்களை இயக்கியிருந்த மித்ரன் ஜவஹர் மீண்டும் நான்காவது முறையாக தனுஷை வைத்து இயக்கும் படம்தான் திருச்சிற்றம்பலம். ராசி கண்ணா, நித்யா மேனன் மற்றும் பிரியா பவானி ஷங்கர் ஆகியோர் கதாநாயகிகளாக நடிக்கின்றனர்.

தாய்க் கிழவி

இந்தப் படத்தில் நாட்டாமை திரைப்படத்தில் இடம் பெற்ற "தாய்க் கிழவி" என்ற பிரபலமான வசனத்தை வைத்துதான் தனுஷ் பாடல் எழுதியுள்ளாராம். நேற்று இந்தப் பாடலின் புரமோ வெளியானது. அதில் அனிருத், நடன இயக்குநர் சதீஷ் மற்றும் தாய்க் கிழவி வசனத்தை பேசி இருந்த நடிகர் பொன்னம்பலம் உள்ளிட்டோர் நடித்திருந்தனர். இந்தப் புரமோ ரசிகர்கள் மத்தியில் இன்னும் ஆர்வத்தை தூண்டியிருக்கிறது.