Thiruchitrambalam Box Office: பாசிட்டிவ் விமர்சனங்கள் பறக்குது.. திருச்சிற்றம்பலம் 2வது நாள் வசூல்!

ஐஸ் பிரியாணி

பழைய சோறு என்பதையே ஐஸ் பிரியாணின்னு சொல்லி சாப்பிடக் கூடிய ஊருய்யா எங்க ஊரு என்பது போல பல படங்களில் பார்த்து புளித்துப் போன கதையாக இருந்தாலும், இயக்குநர் அட்லி ஜெயித்ததை போல இந்த முறை மித்ரன் ஆர் ஜவஹரும் ஜெயித்து விட்டார் என்று தான் சொல்ல வேண்டும். அந்த அளவுக்கு விளாசித் தள்ளும் விமர்சகர்களும் படத்தை பாராட்டி உள்ளனர்.

காப்பாற்றிய நித்யா மேனன்

180 டிகிரி படத்தில் நடிக்க ஆரம்பித்ததில் இருந்தே நல்ல நடிப்பை கொடுத்துக் கொண்டிருக்கும் மெர்சல் நடிகை ஓகே கண்மணி நித்யா மேனனுக்கு அதிக வாய்ப்புகள் கிடைக்க வில்லை என்றாலும், கிடைக்கும் வாய்ப்புகளில் எல்லாம் தனது தேர்ந்த நடிப்பால் சிக்ஸர் அடித்து விடுகிறார். திருச்சிற்றம்பலம் படம் தப்பிக்க முக்கிய காரணமே சோபனாவாக அவர் நடித்துள்ள நடிப்பு தான்.

காட்சிகள் அதிகரிப்பு

போட்டிக்கு எந்த படமும் இல்லாத நிலையில், ஏற்கனவே ஓடிக் கொண்டிருக்கும் சீதா ராமம், விருமன் படங்களின் காட்சிகளை குறைத்து விட்டு திருச்சிற்றம்பலம் படத்துக்கு கூடுதல் காட்சிகளை தியேட்டர் நிர்வாகங்கள் ஒதுக்கி உள்ளன. இந்த 4 நாட்களில் மொத்த வசூலையும் அள்ளி விட வேண்டும் என்கிற முனைப்புடன் தியேட்டர் ஓனர்கள் ஸ்பெஷல் காட்சிகளுக்கும் கூடுதல் ஸ்க்ரீன்களுக்கும் ஏற்பாடு செய்துள்ளனர்.

சந்தோஷத்தில் சன் பிக்சர்ஸ்

அண்ணாத்த, எதற்கும் துணிந்தவன், பீஸ்ட் என வரிசையாக படங்கள் வசூலை குவித்தாலும், விமர்சன ரீதியாக பலத்த அடி வாங்கின. இந்நிலையில், தனுஷின் திருச்சிற்றம்பலம் படத்திற்கு வசூலும் விமர்சனமும் பாசிட்டிவ் ஆக அமைந்த நிலையில், சன் பிக்சர்ஸ் ரொம்பவே சந்தோஷத்தில் ஆழ்ந்துள்ளது. நம்ம பழம் ஜெயிச்சுட்டான், பிளாக்பஸ்டர் ஹிட் என இரண்டாவது நாளிலேயே போஸ்டர் அடித்து விட்டது.

வசூல் எவ்வளவு

திருச்சிற்றம்பலம் படத்தின் முதல் நாள் வசூல் தமிழ்நாட்டில் 9 கோடியும் உலகளவில் 11 கோடியும் வந்துள்ளதாக தகவல்கள் வெளியாகி உள்ளன. இரண்டாம் நாளான நேற்று திருச்சிற்றம்பலம் படத்தின் வசூல் மொத்தமாக 10 கோடி வந்துள்ளது என தகவல்கள் வெளியாகி உள்ளன. இரண்டு நாட்களில் ஒட்டுமொத்தமாக 21 கோடி ரூபாய் வரை திருச்சிற்றம்பலம் வசூலித்து என்றும் சனி மற்றும் ஞாயிற்றுக் கிழமை மேலும், 20 கோடி வசூல் வரும் என்றும் எதிர்பார்க்கப்படுகிறது.