நன்றி சொல்ல மறந்து போன பிரதீப் ரங்கநாதன்.. இப்பதான் நியாபகம் வந்துச்சாம்!

கோமாளி பட இயக்குநர்

நடிகர் ஜெயம் ரவி நடிப்பில் கடந்த 2019ம் ஆண்டில் வெளியான கோமாளி படத்தை இயக்கி கோலிவுட்டில் கவனம் பெற்ற இயக்குநராக மாறினார் பிரதீப் ரங்கநாதன். 90ஸ் கிட்சின் வாழ்க்கையை மையமாக கொண்டு வெளியான இந்தப் படம் சிறப்பான விமர்சனங்களையும் வசூலையும் பெற்றுத் தந்தது. தொடர்ந்து இரண்டு ஆண்டுகள் கழித்து தற்போது லவ் டுடே படத்தை இயக்கி நடித்துள்ளார் பிரதீப்.

ரசிகர்களை கவர்ந்த வெற்றிப்படம்

2K கிட்ஸ்களின் காதலை மையமாக கொண்டு இந்தப் படம் வெளியாகியுள்ளது. படத்திற்கு யுவன் சங்கர் ராஜா இசையமைத்துள்ளார். நாயகியாக இவானா நடித்துள்ளார். மேலும் படத்தில் யோகிபாபு, சத்யராஜ், ராதிகா உள்ளிட்டவர்கள் முக்கியமான கேரக்டர்களில் நடித்துள்ளனர். கடந்த 4ம் தேதி திரையரங்குகளில் வெளியான இந்தப் படம் ரசிகர்களை வெகுவாக கவர்ந்து தற்போது 100 கோடி ரூபாய் வசூலை நோக்கி நடைபோட்டு வருகிறது.

ஓடிடியிலும் வெளியீடு

படம் கடந்த மாதம் 4ம் தேதி வெளியாகி ரசிகர்களை வெகுவாக கவர்ந்துள்ளது. இதையடுத்து வரும் 2ம் தேதி நெட்பிளிக்ஸ் ஓடிடியிலும் வெளியாகவுள்ளது. இந்த ரிலீசுக்காக தற்போது முதலே ரசிகர்களை காத்திருக்கின்றனர். இதனிடையே இந்தப் படத்திற்கு தமிழில் கிடைத்த வரவேற்பை தொடர்ந்து தெலுங்கிலும் படம் ரிலீஸ் செய்யப்பட்டுள்ளது. அங்கும் ரசிகர்களை இந்தப் படம் வெகுவாக கவர்ந்துள்ளது.

லவ் டுடே இயக்குநருக்கு நன்றி

கடந்த 1997ம் ஆண்டில் விஜய் நடிப்பில் வெளியாகி சிறப்பான வெற்றியை கொடுத்து விஜய்யின் கேரியரில் முக்கியமான படமாக அமைந்த படம் லவ் டுடே. இந்தப் படத்தில் சுவலட்சுமி ஜோடியாக நடித்திருந்தார். இந்தப் படத்தின் தலைப்பைதான் தற்போது பிரதீப் தனது படத்திற்காக பயன்படுத்தியுள்ளார். இதனிடையே தற்போது லவ் டுடே இயக்குநர் பாலசேகரனுக்கு நன்றி தெரிவித்துள்ளார் பிரதீப் ரங்கநாதன்.

இயக்குநர் பாலசேகரனுக்கு பாராட்டு

இதுகுறித்து அவர் தனது ட்விட்டர் பக்கத்தில் லவ் டுடே தலைப்பை சிறப்பான வகையில் உருவாக்கிய பாலசேகரனுக்கு நன்றி சொல்ல மறந்துவிட்டதாக தெரிவித்துள்ளார். காலத்தால் அழியாத தலைப்பை உருவாக்கியுள்ளதாகவும் பிரதீப் பாராட்டு தெரிவித்துள்ளார். மேலும் தலைப்பிற்கு நன்றி என்று கூறியுள்ள பிரதீப், பெருந்தன்மையுடன் இருந்ததற்கும் நன்றி தெரிவித்துள்ளார்.