சட்டப்படி மனைவியை விவாகரத்து பெற்றார் டைரக்டர் பாலா

விருது பட டைரக்டர்

பாலாவின் படங்கள் இதுவரை 6 தேசிய விருதுகள், 13 மாநில விருதுகள், 14 சர்வதேச விருதுகளை பெற்றுள்ளன. விருது மட்டுமல்ல பாலாவின் படத்தில் நடித்து விட்டால் அதற்கு பிறகு அந்த நடிகர், நடிகைகளுக்கு சினிமாவில் பல வாய்ப்புக்கள் கிடைத்து, நல்ல எதிர்காலம் இருப்பதும் உறுதியாகி விடும். இதனால் பாலா படத்தில் நடிக்க வாய்ப்பு கிடைக்காதா என பலரும் காத்துக்கிடக்கிறார்கள்.

நடிகர்களை செதுக்கிய பாலா

சேது, நந்தா, பிதாமகன், பரதேசி என பல படங்களை இயக்கினார். விக்ரம், சூர்யா, ஆர்யா, விஷால், அதர்வா என பல நடிகர்களின் நடிப்பு திறமையை வெளியுலகிற்கு எடுத்துக் காட்டியவர் பாலா. டைரக்டர், தயாரிப்பாளர், திரைக்கதை எழுத்தாளர் என பல முகங்களைக் கொண்ட பாலா, கடைசியாக வர்மா என்ற படத்தை இயக்கினார். அதைத் தொடர்ந்து விசித்திரன் என்ற படத்தை தயாரித்தார்.

மீண்டும் பாலா டைரக்ஷன்

அதன் பிறகு சினிமாவில் இருந்து ஒதுங்கி இருந்த பாலா, தற்போது நீண்ட இடைவேளைக்கு பிறகு சூர்யாவின் 2டி என்டர்டைன்மென்ட் தயாரிக்கும் படத்தை பாலா இயக்க உள்ளார். விரைவில் இந்த படம் துவங்க உள்ளதால் இந்த படத்தின் மீதான எதிர்பார்ப்பு அதிகரித்து வருகிறது. அதுவும் பாலா இயக்க போகும் படத்தில் 16 ஆண்டுகளுக்கு பிறகு சூர்யா-ஜோதிகா மீண்டும் இணைந்து நடிக்க போவதாக கூறப்படுவதால் எதிர்ப்பு பல மடங்காகி உள்ளது.

விவாகரத்து பெற்றார் பாலா

2004 ம் ஆண்டு டைரக்டர் பாலாவுக்கும் முத்துமலர் என்பவருக்கும் மதுரையில் திருமணம் நடைபெற்றது. இவர்களுக்கு பெண் குழந்தை ஒன்று உள்ளது. திருமணமாகி 17 ஆண்டுகள் ஆன நிலையில், கடந்த சில ஆண்டுகளுக்கு முன் இவரும் கருத்து வேறுபாடு காரணமாக பிரிந்து வாழ்ந்தனர். இதைத் தொடர்ந்து கோர்ட்டில் சட்டப்படி விவாகரத்து பெறும் நடைமுறைகள் நடைபெற்று வந்தன. இந்நிலையில் சமீபத்தில் குடும்ப நல கோர்ட் இவர்களுக்கு சட்டப்படி விவாகரத்து வழங்கி உள்ளது.