சாமியை வெய்ட்டிங் லிஸ்டில் வைத்து சிங்கத்தை கையில் எடுத்த ஹரி

சென்னை: தமிழ் சினிமாவின் அதிரடி இயக்குநர்களில் ஒருவரான ஹரி தற்போது சிங்கம் 3 படத்தின் வேலைகளில் மிகவும் தீவிரமாக இறங்கியுள்ளார்.

2003 ல் வெளிவந்து சூப்பர் ஹிட்டடித்த சாமி திரைப்படத்தின் 2 ம் பாகத்தை உருவாக்க ஆர்வம் காட்டிய ஹரி, சிங்கம் மற்றும் சிங்கம் 2 படத்தின் வெற்றிகளைப் பார்த்த பின் சிங்கம் 3 யை முதலில் முடிக்கத் திட்டமிட்டுள்ளார்.

‘சாமி' படத்தில் விக்ரம் நாயகனாகவும் இவருக்கு ஜோடியாக திரிஷாவும் நடித்திருந்தனர் படம் எதிர்பார்த்ததை விடவும் நன்கு கல்லா கட்டியது. எனினும் ‘சிங்கம் 3' முடிந்த பிறகு தான் ‘சாமி 2' வை கையில் எடுக்கப் போகிறாராம் ஹரி.

ஏற்கனவே ரசிகர்களிடம் நல்ல வரவேற்பு பெற்ற ‘சிங்கம்', ‘சிங்கம் 2' படத்தின் தொடர்ச்சியாக இந்த புதிய படத்தை உருவாக்க இருக்கும் ஹரி படத்திற்காக சமீபத்தில் வெளிநாடுகளில் உள்ள படப்பிடிப்பு தளங்களை பார்வையிட்டு வந்திருக்கிறார்.

முதல் 2 பாகத்திலும் நாயகனாக நடித்த சூர்யாவே சிங்கம் 3 யிலும் நாயகனாக களமிறங்குகிறார்,முதல் இரண்டு பாகங்களில் ஜோடியாக நடித்த அனுஷ்கா இந்த படத்தில் இடம் பெறவில்லை என்றும் அவருக்கு பதிலாக சுருதி ஹாசன் நடிக்க இருப்பதாகவும் கூறுகின்றனர்.

இப்படத்தின் படப்பிடிப்பு விரைவில் தொடங்க இருக்கிறது. சூர்யா தற்போது ‘24' என்ற படத்தில் நடித்து வருகிறார். இப்படத்தின் படப்பிடிப்பு முடிந்த பிறகு ‘சிங்கம் 3' படப்பிடிப்பில் கலந்துக் கொள்ள இருக்கிறார். இப்படத்தையடுத்து இயக்குநர் ஹரி ‘சாமி' படத்தின் 2ம் பாகத்தை எடுக்க இருப்பதாக தகவல்கள் வெளியாகி இருக்கின்றன.

சாமியா இருந்தாலும் வெய்ட்டிங் லிஸ்ட் தான் போல....