இயக்குனர் சமுத்திரக்கனிக்கு ஹேப்பி பர்த்டே... ஆளுயர மாலை போட்டு கேக் வெட்டிய ”அச்சமின்றி” படக்குழு!

சென்னை: பிரபல இயக்குனரும், நடிகருமான சமுத்திரக்கனி தன்னுடைய பிறந்தநாளை "அச்சமின்றி" படக்குழுவினருடன் கொண்டாடியுள்ளார்.

"சுப்ரமணியபுரம்", "நாடோடிகள்", "நிமிர்ந்து நில்" ஆகிய தரமான படங்களை தந்தவர் இயக்குனர் சமுத்திரக்கனி.

இயக்குனராக பளிச்சிட்டாலும், தமிழ் சினிமாவில் ஒரு நல்ல நடிகராகவும் வலம் வந்து கொண்டிருக்கிறார்.

குணச்சித்திர நடிகர்:

"சாட்டை", "வேலையில்லா பட்டதாரி" ஆகிய படங்களில் இவரது குணச்சித்திர நடிப்பு மக்களால் பெரிதும் பாராட்டப்பட்டது.

கையில் அரை டஜன் படங்கள்:

தற்போது இவரது கைவசம் அரை டஜன் படங்கள் உள்ளன. மேலும், படங்களை இயக்கும் பணியையும் விடாமல் தொடர்ந்து வருகிறார்.

இன்று பிறந்தநாள்:

இந்நிலையில், சமுத்திரகனி இன்று தனது பிறந்தநாளை கொண்டாடி வருகிறார். இவர் தற்போது நடித்து வரும் "அச்சமின்றி" படக்குழுவுடன் கேக் வெட்டி தனது பிறந்தநாளை கொண்டாடினர்.

கேக் வெட்டிக் கொண்டாட்டம்:

"அச்சமின்றி" படத்தில் விஜய் வசந்த், சிருஷ்டி டாங்கே முன்னணி கதாபாத்திரத்தில் நடித்து வருகின்றனர். என்னமோ நடக்குது படத்தை இயக்கிய ராஜபாண்டி இயக்கிவருகிறார். இப்படத்தில் சமுத்திரகனி முக்கிய கதாபாத்திரத்தில் நடித்து வருகிறார்.

ஆள் உயர மாலை அணிவித்த படக்குழு:

சமுத்திரகனியின் பிறந்தநாளையொட்டி படக்குழுவினர் அவருக்கு ஆள் உயர மாலை அணிவித்து தங்களது பாராட்டுக்களை தெரிவித்தனர்.