சினிமாவை மிரட்டிய கொடூர கொரோனா .. விஜய், அஜித் படங்கள் இல்லாத 2020.. சோலோவாக அசத்திய யோகிபாபு!

உயிர்க்கொல்லி

கட் அவுட் வைத்து, விசிலடித்து ஆர்ப்பாட்டமாகப் படம் பார்க்க வேண்டும் அவர்களுக்கு. ஆனால், இந்த வருடம் டாப் ஹீரோ படங்களுக்கு மொத்தமாகத் தடை விதித்துவிட்டது, கண்ணுக்குத் தெரியாத உயிர்க் கொல்லி கொரோனா. இந்த வைரஸ் பரவல் காரணமாக, அதிகமாகப் பாதிக்கப்பட்டது சினிமா துறை.

ரஜினியின் தர்பார்

பல படங்களின் ரிலீஸ் தள்ளி வைக்கப்பட்டன. ஷூட்டிங் தடைபட்டன. தியேட்டர்கள் இழுத்து மூடப்பட்டன. ஒட்டுமொத்தமாக சினிமா துறை கடும் பாதிப்பை சந்தித்தது. இதனால் பட டாப் ஹீரோக்களின் படங்கள் இந்த வருடம் ரிலீஸ் ஆகவில்லை. கடந்த ஜனவரி மாதம் ரஜினியின் தர்பார் மட்டும் ரிலீஸ் ஆகி இருந்தது.

விஜய்யின் மாஸ்டர்

அந்தப் படத்தை அடுத்து ஏப்ரல் மாதம் ரிலீஸ் ஆக இருந்தது, விஜய்யின் மாஸ்டர். ஆனால், மார்ச் மாத இறுதியில் இருந்தே லாக்டவுன் பிறப்பிக்கப்பட்டு விட்டது. இதனால், ரத்து செய்யப்பட்ட மாஸ்டர் ரிலீஸ், பொங்கலுக்கு தள்ளிப் போய் இருக்கிறது.

அஜித்தின் வலிமை

சூர்யா, தனது சூரரைப் போற்று படத்தை ஓடிடியில் வெளியிட்டார். அதற்கு நல்ல வரவேற்பும் கிடைத்தது. அஜித்தின் வலிமையை கடந்த தீபாவளிக்கு திரையிட முடிவு செய்திருந்தனர். ஆனால், அடுத்த வருடத்துக்குச் செல்கிறது, வலிமை ரிலீஸ். வழக்கமாக அதிக படங்களில் நடிப்பவர் விஜய் சேதுபதி.

முன்னணி ஹீரோ

அவர் நடித்த படங்கள் இரண்டு மட்டுமே (ஓ மை கடவுளே, க/பெ ரணசிங்கம்) இந்த வருடம் வெளியாகி இருக்கிறது. தனுஷ் நடித்த பட்டாஸ், ஜனவரி மாதம் ரிலீஸ் ஆனது. முன்னணி ஹீரோக்களின் படங்கள் எதுவும் இந்த வருடம் வெளியாகவில்லை என்றாலும் அதிகமான படங்களில் நடித்தவர் பட்டியலில் இடம்பிடித்திருக்கிறார், காமெடி நடிகர் யோகிபாபு.

அதிக படங்கள்

இந்த வருடத் தொடக்கத்தில் வெளியான ரஜினியின் தர்பார் தொடங்கி சில நாட்களுக்கு முன் ரிலீஸான கன்னிராசி வரை, ஒன்பது படங்களில் யோகிபாபு நடித்திருக்கிறார். டாப் ஹீரோக்கள் படங்கள் இல்லாத இந்த வருடத்தின் குறையை அடுத்த வருடம் தீர்க்கும் என்று நம்புகிறார்கள், ரசிகர்கள். இதற்கிடையே புதிய வகை கொரோனா தொற்றும் பயமுறுத்திக் கொண்டிருக்கிறது, ஆக்ரோஷமாக!