ஓரினச் சேர்க்கையாளர்களாக நடித்துள்ள அனகா, கெளரி கிஷன்.. பாராட்டுக்களை அள்ளும் மகிழினி ஆல்பம்!

மகிழினி

சரிகமா தமிழ் யூடியூப் சேனலில் மகிழினி ஆல்பம் பாடல் வெளியாகி வைரலாகி வருகிறது. இயக்குநர் வி.ஜி. பாலசுப்ரமணியன் இந்த பாடலை இயக்கி உள்ளார். ஓரினச் சேர்க்கையாளர்களுக்கு ஆதரவு அளிக்கும் வகையிலும் அவர்களின் மன நிலையை குடும்பத்தினர் குறிப்பாக பெற்றோர்கள் புரிந்து கொள்ள வேண்டும் என்கிற நோக்கத்துடன் இந்த பாடல் உருவாக்கப்பட்டுள்ளது.

96 ஜானு

விஜய்சேதுபதி, திரிஷா நடிப்பில் வெளியான 96 படத்தில் பள்ளிப் பருவ ஜானுவாக நடித்து ரசிகர்களை ஈர்த்தவர் கெளரி கிஷன். தளபதி விஜய்யின் மாஸ்டர், தனுஷின் கர்ணன் உள்ளிட்ட படங்களில் நடித்துள்ள கெளரி கிஷன் ஆல்பம் பாடல்கள் பக்கமும் அதிகளவில் கவனம் செலுத்தி வருகிறார். இந்நிலையில், இந்த மகிழினி ஆல்பத்தில் சென்னையை சேர்ந்த மலர் கதாபாத்திரத்தில் நடித்துள்ளார்.

டிக்கிலோனா ஹீரோயின்

ஹிப்ஹாப் தமிழா ஆதியின் நட்பே துணை படத்தின் மூலம் தமிழ் சினிமாவில் அறிமுகமானவர் நடிகை அனகா. சமீபத்தில் வெளியான சந்தானத்தின் டிக்கிலோனா படத்திலும் ஹீரோயினாக நடித்த அனகா "பேர் வச்சாலும்" பாடலுக்கு நடனமாடி ஒட்டுமொத்த ரசிகர்களையும் தன் பக்கம் ஈர்த்து இருந்தார். இந்நிலையில், இவரும் கெளரி கிஷனும் இணைந்து இந்த ஆல்பத்தில் ஓரினச் சேர்க்கையாளர்களாக நடித்துள்ளனர்.

ஓரினச் சேர்க்கையாளர்கள்

சென்னையை சேர்ந்த மலர் மற்றும் டில்லியில் இருந்து சென்னைக்கு வரும் இந்துஜா பரதநாட்டிய பள்ளியில் பயிற்சியின் போது ஒருவரை ஒருவர் காதலிக்கத் தொடங்குகின்றனர். கெளரி கிஷனின் பெற்றோர் அவரது இந்த விருப்பத்திற்கு சம்மதம் தெரிவிக்காமல் அடித்து துன்புறுத்தும் காட்சிகளும் இடம்பெற்றுள்ளன. கடைசியாக இருவரையும் பரத நாட்டியம் எப்படி சேர்க்கிறது என்பதும் இந்த சமூகம் ஓரினச் சேர்க்கையாளர்களுக்கான உரிமையை வழங்க வேண்டும் என்பதையும் இந்த பாடல் உணர்த்துகிறது. மதன் கார்க்கி வரிகளும், கோவிந்த் வசந்தாவின் இசையும் அருமை.

பெருகும் ஆதரவு

பாவக் கதைகள் ஆந்தாலஜியில் விக்னேஷ் சிவன் இயக்கத்தில் வெளியான லவ் பண்ணா உட்றணும் மற்றும் ஐஸ்வர்யா ராஜேஷ் நடிப்பில் வெளியான திட்டம் இரண்டு உள்ளிட்ட படங்கள் ஓரினச் சேர்க்கையாளர்களுக்கு ஆதரவு அளிக்கும் கதைகளாக உருவாகின. இந்நிலையில், மகிழினி ஆல்பம் அந்த வரிசையில் இடம்பெற்றுள்ளது.