ஷுட்டிங் முடிஞ்சிடுச்சு...விஜயகாந்த் நடித்தாரா? இல்லையா?...டைரக்டர் சொன்ன ஹாட் நியூஸ்

முதல் தமிழ் படம்

தனித்துவமான கதை அம்சம் கொண்ட படம் என கூறப்படும் மழை படிக்காத மனிதன் படத்தின் பெரும்பாலான பகுதிகள் டையூ மற்றும் டாமன் தீவுகளில் படமாக்கப்பட்டது. இங்கு படமாக்கப்பட்ட முதல் தமிழ் படம் இது தான். இந்த படத்தில் சரத்குமார் மிக முக்கியமான ரோலில் நடித்துள்ளதாக கூறப்படுகிறது.

விஜயகாந்த் மீண்டும் நடிக்கும் படம்

இந்த படத்தின் ஹைலைட்டாக ஆரம்பம் முதல் சொல்லப்பட்ட விஷயம், நடிகர் விஜயகாந்த் இந்த படத்தின் மூலம் மீண்டும் சினிமாவில் நடிக்கிறார் என்பது தான். உடல்நிலை காரணமாக கடந்த சில ஆண்டுகளாக தீவிர அரசியல் மற்றும் சினிமாவில் இருந்து ஒதுங்கி, ஓய்வில் இருந்து வருகிறார் விஜயகாந்த். கட்சிப் பணிகளை கூட அவரது குடும்பத்தினர் தான் கவனித்து வருகிறார்கள்.

விஜயகாந்த் நடித்தாரா? இல்லையா?

மழைபிடிக்காத மனிதன் படத்தில் விஜய்காந்த் நடிக்கிறார் என்றும், பிறகு நடிக்கவில்லை என்றும் பல தகவல்கள் கூறப்பட்டது. இந்த சமயத்தில் படத்தின் ஷுட்டிங் முடிக்கப்பட்டு விட்டதாக அறிவிக்கப்பட்டுள்ளதால் விஜயகாந்த் நடிக்க வேண்டிய காட்சிகள் படமாக்கப்பட்டு விட்டதா, அவர் நடித்து முடித்து விட்டாரா என்ற சந்தேகம் அனைவரின் மனதிலும் எழுந்துள்ளது.

டைரக்டர் என்ன சொல்றார்

இது பற்றி டைரக்டர் விஜய் மில்டனிடம் கேட்டதற்கு, படம் நன்றாக வந்திருக்கிறது. விஜய் ஆன்டனியுடன் பணியாற்றியது மகிழ்ச்சி. விஜய்காந்த் இந்த படத்தில் சில காட்சிகளில் நடிப்பதாக கூறி இருந்தோம். ஆனால் அவர் நடிக்கும் காட்சிகள் இதுவரை படமாக்கப்படவில்லை. தொடர்ந்து அது தாமதமாகி வருகிறது. அவரது உடல்நிலை காரணமாக அவரால் வெளியே வர முடியவில்லை.

காத்துக் கொண்டிருக்கிறோம்

ஆனால் அவரது பகுதி படத்திற்கு மிகவும் முக்கியமானது. அதனால் நிச்சயம் அவர் நடிக்கும் பகுதிகளை படமாக்குவோம். ஆனால் படத்தில் அவர் நடிப்பாரா அல்லது வெறும் வாய்ஸ் மட்டும் கொடுப்பாரா என்பதை பொறுத்திருந்து தான் பார்க்க வேண்டும். அதற்காக தான் நாங்களும் காத்துக் கொண்டிருக்கிறோம் என்றார்.

மேகா ஆகாசை பாராட்டிய டைரக்டர்

மேகா ஆகாஷ் பற்றி கூறுகையில், அவர் மிக முக்கியமான ரோலில் நடித்துள்ளார். அவரது முந்தைய படங்களை விட இதில் மிக சிறப்பாக நடித்துள்ளார். மிக அற்புதமான நடிப்பை வெளிப்படுத்தி உள்ளார் என பாராட்டினார் விஜய் மில்டன்.