ருத்ரமாதேவி பின்னணி இசைச் சேர்ப்பு... லண்டனுக்குப் பறந்தார் இளையராஜா!

ருத்ரமாதேவி படத்தின் பின்னணி இசைச் சேர்ப்புக்காக லண்டன் சென்றுள்ளார் இளையராஜா.

குணசேகர் தயாரித்து இயக்கியுள்ள பிரமாண்ட சரித்திரப் படம் ருத்ரமாதேவி.

இப்படத்தில் அனுஷ்கா, அல்லு அர்ஜுன், ராணா, பிரகாஷ்ராஜ், நித்யா மேனன் உள்ளிட்ட பலர் நடித்து வருகிறார்கள். குணசேகருடன் இணைந்து தேனாண்டாள் பிலிம்ஸ் பிரம்மாண்டமாக தயாரித்துள்ளது.

பதிமூன்றாம் நூற்றாண்டில் நாற்பது வருடங்கள் தன்னிகரில்லா அரசியாக நாட்டை ஆண்ட ருத்ரமா தேவியின் வாழ்க்கை கதையாக இப்படம் தயாராகி வருகிறது. இதில் ருத்ரமாதேவியாக அனுஷ்கா நடித்துள்ளார். விறுவிறுப்பாக நடந்து வந்த இப்படத்தின் படப்பிடிப்பு முடிந்து தற்போது படத்திற்கான பின்னணி இசை சேர்ப்பு வேலைகள் தொடங்கியுள்ளன.

இதற்காக நேற்று லண்டனுக்குக் கிளம்பினார் இளையராஜா. அங்கு இரண்டு வாரங்கள் தங்கி படத்திற்கான பின்னணி இசை சேர்ப்பு பணிகளை முடித்து விட்டு சென்னை திரும்புகிறார்.