இசையமைப்பாளர் இமான், வில்லன் சிபிராஜுடன் "போக்கிரி ராஜா" வில் களமிறங்கும் ஜீவா...

போக்கிரி ராஜா

ரஜினியின் மாபெரும் பிளாக்பஸ்டர் படங்களில் ஒன்றான போக்கிரி ராஜா படத்தின் தலைப்பை தற்போது ஜீவா நடிக்கும் புதிய படத்திற்கு தலைப்பாக உறுதி செய்திருக்கின்றனர்.

ஜீவா- ஹன்சிகா

முதன்முறையாக இந்தப் படத்தில் ஹன்சிகாவுடன் இணைந்து நடிக்கிறார் ஜீவா. திருநாள், கவலை வேண்டாம் படங்களைத் தொடர்ந்து போக்கிரி ராஜாவாக மாறுகிறார் ஜீவா.

இசையமைப்பாளர் இமான்

ரொமான்ஸ் + காமெடி கலந்து உருவாகும் இந்தப் படத்திற்கு முன்னணி இசையமைப்பாளர்களில் ஒருவரான டி.இமான் இசையமைக்கிறார். இந்தத் தகவலை இயக்குநர் ராம்பிரகாஷ் தனது ட்விட்டர் பக்கத்தில் அறிவித்து இருக்கிறார்.

வில்லனாக சிபி

இந்தப் படத்தில் ஜீவாவுக்கு வில்லனாக நடிகர் சிபிராஜ் நடிக்கவிருக்கிறார். இதற்காக மிகப்பெரிய தொகை ஒன்று அவருக்கு பேசப்பட்டிருக்கிறதாம். தற்போது ஜாக்சன் துரையில் நடித்துக் கொண்டிருக்கும் சிபி ஜாக்சன் துரையை முடித்து விட்டு, போக்கிரி ராஜாவுடன் விரைவில் இணைந்து கொள்வார் என்று எதிர்பார்க்கப் படுகிறது.

சென்னையில் இருந்து

போக்கிரி ராஜாவின் படப்பிடிப்பை சென்னையில் நடத்த திட்டமிட்டு இருக்கிறார் இயக்குநர் ராம்பிரகாஷ். பி.டி.செல்வக்குமார் தயாரிக்கும் இப்படம் அடுத்த வருட ஆரம்பத்தில் திரைக்கு வரலாம் என்று எதிர்பார்க்கப்படுகிறது.

போக்கிரிக்கு போக்கிரி ராஜா...