ஜூன் 26 ம் தேதியில் ஒன்றல்ல இரண்டல்ல மொத்தம் ஒன்பது படங்கள் வெளியாகின்றன

சென்னை: 6 மாதத்தில் செஞ்சுரி அடித்து சாதனை புரிந்த தமிழ் சினிமா போகின்ற போக்கைப் பார்த்தால், இந்த வருடத்தில் இன்னும் ஒரு செஞ்சுரி அடித்து விடும் போல. ஆமாம் வாரத்திற்கு இரண்டு அல்லது மூன்று படங்கள் மட்டுமே வெளியாகி தயாரிப்பாளர்களுக்கு ஓரளவு லாபத்தைக் கொடுத்து வந்தன.

ஆனால் அதற்கும் முட்டுக்கட்டை இடும் நோக்கில் வரும் ஜூன் 26 ம் தேதி மொத்தமாக 9 படங்கள் வெளியாக உள்ளன. இதில் நேரடித் தமிழ்ப் படங்களின் எண்ணிக்கை 8, ஒரே ஒரு படம் மட்டும் ஹாலிவுட் படம்.

ஆதியின் யாகாவாராயினும் நாகாக்க, விமலின் காவல், விஷ்ணுவின் இன்று,நேற்று,நாளை போன்ற இளம் நடிகர்களின் படங்களுடன் கருணாஸின் லொடுக்கு பாண்டி மற்றும் மதுமிதாவின் மூணே மூணு வார்த்தை போன்ற படங்களும் வெளியாக உள்ளன.

இந்தப் போட்டி பத்தாது என்று சிறு பட்ஜெட் படங்களான ஒரு தோழன் ஒரு தோழி, பரஞ்ஜோதி, மீனாட்சி காதலன் இளங்கோவன் போன்ற மூன்று படங்களும் ஜூன் 26 ம் தேதியில் வெளியாக உள்ளன.

ஹாலிவுட் படமான டெமானிக் படமும் இந்த வரிசையில் இணைந்து போட்டிக் களத்தில் குதித்துள்ளது.

ஒரே நாளில் இத்தனை படங்களா என்று ஆச்சரியத்தில் மூழ்கியுள்ளது ஒட்டுமொத்தக் கோடம்பாக்கமும்.