75 நாட்களை நிறைவு செய்த விக்ரம்...ரூ.500 கோடி வசூல் கிளப்பில் இணைந்ததா?

Published: Tuesday, August 16, 2022, 16:48 [IST]

சென்னை : டைரக்டர் லோகேஷ் கனகராஜ் இயக்கத்தில் கமல் நடித்த ஆக்ஷன் பொழுதுபோக்கு படம் விக்ரம். இந்த படம் ஜுன் 3 ம் தேதி உலகம் முழுவதும் ரிலீஸ் செய்யப்பட்டு, அனைத்து தரப்பிலும் வரவேற்பை பெற்றது.

விஜய் சேதுபதி, ஃபகத் ஃபாசில் நடித்திருந்த இந்த படத்தில் சூர்யா, ரோலக்ஸ் ரோலில் கெஸ்ட் ரோல் செய்திருந்தார். ராஜ்கமல் ஃபிலிம்ஸ் இன்டர்நேஷனல் தயாரித்த இந்த படம் தமிழகத்தில் இதுவரை எந்த படமும் பெறாத வசூல் சாதனையை படைத்தது.

படம் ரிலீசாகி இரண்டு மாதம் கடந்த போதும் விக்ரம் படத்தை பார்க்க தொடர்ந்து பலரும் ஆர்வம் காட்டி வருகின்றனர். 4 ஆண்டு இடைவெளிக்கு பிறகு கமல் நடித்த இந்த படம் அவருக்கு மிகப் பெரிய கம் பேக்காக அமைந்தது.

75 நாட்களை நிறைவு செய்த விக்ரம்

விக்ரம் படம் தியேட்டர்களில் ரிலீசாகி இன்றுடன் 75 நாட்கள் நிறைவடைந்து விட்டது. இந்த தகவலை தனது ட்விட்டர் பக்கத்தில் பகிர்ந்துள்ள ராஜ் கமல் ஃபிலிம்ஸ், 75 நாட்களை கடந்து தொடர்ந்து ஓடிக் கொண்டிருக்கும் விக்ரம் இந்திய சினிமாவின் மாபெரும் சக்தி என குறிப்பிட்டுள்ளது.

ஒரே மாதத்தில் 400 கோடி வசூல்

தமிழகத்தில் பல சாதனைகளை ஏற்கனவே விக்ரம் படம் முறியடித்து விட்டது. ரிலீசான 17 நாட்களிலேயே 155 கோடிகளை வசூல் செய்தது. ஜுன் மாதத்திலேயே இந்த படத்தின் வசூல் 400 கோடிகளை கடந்து விட்டது. தற்போது வரை ரசிகர்கள் கொண்டாடும் படமாக விக்ரம் இருந்து வருகிறது.

தியேட்டரில் தான் பார்க்கணும்

தியேட்டரை தொடர்ந்து ஜுலை 8 ம் தேதி ஓடிடி தளமான டிஸ்னி பிளஸ் ஹாட்ஸ்டாரிலும் வெளியிடப்பட்டது.ஓடிடி.,யில் இந்த படத்திற்கான வரவேற்பு குறையவில்லை. ஓடிடியில் வெளியிடப்பட்ட பிறகும் கூட விக்ரம் படத்தை தியேட்டரில் பார்க்க அதிகமானவர்கள் ஆர்வம் காட்டி வருவது பலரையும் ஆச்சரியப்பட வைத்து வருகிறது.

500 கோடி கிளப்பில் இணைந்ததா?

விக்ரம் படம் 75 நாட்களை எட்டி உள்ள நிலையில் இந்த படம் 500 கோடி வசூல் கிளப்பில் இணைந்து விட்டதா? இல்லையா? என்பது தான் பலரின் மிகப் பெரிய கேள்வியாக இருந்து வருகிறது. ஆனால் 75 நாட்களில் விக்ரம் படம் எத்தனை கோடிகளை மொத்தமாக வசூல் செய்தது என்பது பற்றிய விபரம் இதுவரை வெளியிடப்படவில்லை.

100 வது நாளை நெருங்கும் விக்ரம்

கடைசியாக கிடைத்த தகவலின் படி ஜுலை முதல் வார முடிவில் விக்ரம் படம் 411.89 கோடிகளை வசூல் செய்திருந்தது. அதற்கு பிறகு விக்ரம் படம் பற்றிய அதிகாரப்பூர்வ வசூல் விபரம் வெளியிடப்படவில்லை. விரைவில் விக்ரம் படம் 100 வது நாளை எட்ட உள்ளதால், 100 வது நாள் மிகப் பெரிய விழா எடுத்து கொண்டாடப்படும் என எதிர்பார்க்கப்படுகிறது. அன்றைய தினம் மொத்த வசூலை படக்குழு அறிவிக்கும் என எதிர்பார்க்கப்படுகிறது.