ஏப்ரல் 16-ம் தேதி மிரட்ட வருகிறது காஞ்சனா பேய்!

இந்த கோடை விடுமுறையில் ரசிகர்களைக் குதூகலப்படுத்த ஏகப்பட்ட படங்கள் வரிசை கட்டி நிற்கின்றன.

கமல்ஹாஸனின் உத்தமவில்லன், விஜய்யின் புலி, வடிவேலுவின் எலி போன்ற படங்கள் கோடை விருந்தின் ஒரு பகுதி.

இந்த வரிசையில் இருக்கும் முக்கிய படம் ராகவா லாரன்ஸின் காஞ்சனா 2. ஏற்கெனவே படத்தின் போஸ்டர்கள், புகைப்படங்கள் வெளியாகி ரசிகர்களின் ஆர்வத்தைக் கிளறியுள்ளன.

இந்த நிலையில் படத்தை வரும் ஏப்ரல் 16-ம் தேதி வெளியிடுவதாக அதிகாரப்பூர்வமாக அறிவித்துள்ளனர்.

கமல் ஹாஸனின் உத்தம வில்லன் வெளியாகி ஒரே வாரத்தில் காஞ்சனா வெளியாகிறது என்பது குறிப்பிடத்தக்கது.

டாப்சி, நித்யா மேனன், கோவை சரளா, திவ்யதர்ஷினி, ஸ்ரீமன் நடித்துள்ள இந்தப் படம் தமிழ், தெலுங்கில் ஒரே நேரத்தில் வெளியாகிறது. இந்தப் படத்துக்கு தெலுங்கிலும் நல்ல எதிர்ப்பார்ப்பு உள்ளது குறிப்பிடத்தக்கது.