தெலுங்கு டப்பிங்... லிங்கா ரூ 40 கோடி... ஐ ரூ 34 கோடிக்கு விற்பனை?

எந்திரன் டப்பிங் உரிமை ரூ 18 கோடிக்கு விற்பனை விற்பனையானதுதான் முன்பு பெரிய சாதனையாக இருந்தது. ஒரு நேரடி தெலுங்குப் படத்துக்கு நிகராக ரூ 40 கோடி வரை அங்கு ரோபோ படம் வசூலைக் குவித்தது.

அடுத்து இந்த சாதனையை வேறு எந்தப் படமும் முறியடிக்க முடியாது என்ற நிலையில், இப்போது ஷங்கரின் ஐ படம் அதைவிட இருமடங்கு விலைக்கு விற்கப்பட்டதாக செய்திகள் வெளியாகியுள்ளன.

ஷங்கரின் படங்களுக்கு தெலுங்கில் நல்ல வரவேற்பு என்பதால் இந்த செய்தி உண்மையாகவே இருக்கக் கூடும். ஐ ட்ரைலர் முதல் நாளிலேயே 23 லட்சம் பார்வையாளர்களைப் பெற்று புதிய சாதனைப் படைத்தது. இதில் லிங்கா கூட இரண்டாம் இடம்தான் பிடித்தது.

ஆனால் டப்பிங் ரைட்ஸ் விஷயத்தில் ஐ-க்கு இரண்டாம் இடம்தான். காரணம், ரஜினியின் புதிய படமான லிங்கா, அதையெல்லாம் முறியடித்து ரூ 40 கோடிக்கு விற்கப்பட்டுள்ளது. இது மிகப் பெரிய விலை. தெலுங்கில் உருவாகும் நேரடி மெகா பட்ஜெட் படங்களுக்கு நிகரானது என்பது குறிப்பிடத்தக்கது.