குல தெய்வம் கோயிலில் ஜோடியாக சாமி தரிசனம்... திருமணத்திற்கு தயாராகும் நயன்தாரா – விக்கி ஜோடி

பட ரிலீசுக்கு பின் திருமணம்

கடந்த சில ஆண்டுகள் ஒரே வீட்டில் சேர்ந்து வசித்து வரும் இந்த காதல் ஜோடி, ஒன்றாக தயாரிப்பு நிறுவனத்தை துவக்கி படங்கள் தயாரித்து வருகிறார்கள். விக்னேஷ் சிவன் இயக்கத்தில் நயன்தாரா நடித்த காத்து வாக்குல ரெண்டு காதல் படம் சமீபத்தில் தான் ரிலீசாகி ரசிகர்களிடம் நல்ல வரவேற்பை பெற்றது. இந்த படத்தை முடித்த பிறகு தான் திருமணம் செய்ய முடிவு செய்திருந்ததால், படம் ரிலீசானதும் திருமண தேதியை அறிவித்தனர்.

திருமண தேதி அறிவிப்பு

பல மாதங்களாக பல கோயில்களுக்கும் ஜோடியாக சென்று வந்த நயன்தாரா- விக்னேஷ் சிவன் ஜோடி, சமீபத்தில் திருப்பதி சென்று சாமி தரிசனம் செய்து விட்டு வந்த கையோடு, ஜுன் 9 ம் தேதி தங்களின் திருமணம் திருப்பதியில் நடைபெற உள்ளதாக அறிவித்தனர். முதலில் மிக பிரம்மாண்டமாக தான் இவர்களின் திருமணத்தை நடத்த திட்டமிட்டதாகவும், பிறகு முடிவை மாற்றி திருமணத்தை எளிமையாகவும், வரவேற்பை பிரம்மாண்டமாகவும் நடத்த திட்டமிட்டிருப்பதாக கூறப்படுகிறது.

குலதெய்வ கோயிலில் வழிபாடு

இந்த சமயத்தில் இன்று இந்த ஜோடி திருச்சி விமான நிலையத்தில் வந்திறங்கியது. என்ன விபரம் என விசாரித்த போது, விக்னேஷ் சிவனின் குலதெய்வ கோயில் தஞ்சை மாவட்டம் அய்யம்பேட்டை வழுத்தியூரில் உள்ளதாம். இந்த கோயிலில் சாமி தரிசனம் செய்வதற்காக தான் இவர்கள் திருச்சி வந்ததாக கூறப்படுகிறது. திருமண பத்திரிக்கை உள்ளிட்ட திருமண பொருட்களை குலதெய்வ கோயிலில் வைத்து வழிபாடு செய்வதற்காக அவர்கள் வந்திருக்கலாம் என கூறப்படுகிறது.

திருமணத்திற்கு தயாராகும் ஜோடி

ப்ளூ கலர் சுடிதாரில் கையில் ஒரு பெரிய பையுடன் வந்திருந்தார் நயன்தாரா. விக்னேஷ் சிவன் வழக்கம் போல் சிம்பிளாக ஒயிட் டி ஷர்ட் - ஜீன்ஸ் அணிந்து வந்திருந்தார். தஞ்சை அருகே பாபநாசம் வழுத்தூர் கிராமத்து கோயிலில் நயன்தாராவுடன், விக்னேஷ் சிவன் சாமி தரிசனம் செய்த போட்டோக்கள் மற்றும் வீடியோ வெளியாகி செக டிரெண்டாகி வருகிறது.