காக்கி சட்டை.. வந்தாச்சு ஆன்லைன்ல திருட்டு வீடியோ

சிவகார்த்திகேயன் நடிப்பில் நேற்று வெளியான காக்கி சட்டை திரைப்படம் இப்போது இணையதளங்களில் வெளியாகியுள்ளது.

இந்தப் படத்தின் திருட்டு சிடிக்களும் பெரும்பாலான இடங்களில் தாராளமாகக் கிடைக்கிறது.

தயாரிப்பாளர்களுக்கு பெரும் சவாலாகத் திகழ்கிறது திருட்டு சிடி விற்பனை மற்றும் இணையதங்களில் அந்தப் படங்களின் வீடியோ வெளியாவது. பல பெரிய படங்களின் வீழ்ச்சிக்கும் இந்த திருட்டு வீடியோதான் காரணம்.

இதற்கு ஒருவகையில் தயாரிப்பாளர்களே காரணமாகவும் உள்ளனர். படத்தின் வெளிநாட்டு உரிமைகளை விற்பதால், அதிலிருந்துதான் திருட்டு வீடியோ வெளியாவதாகக் குற்றம் சாட்டுகின்றனர்.

ஆனால் போட்ட முதலை உடனே எடுக்கும் வழி சேட்டிலைட் மற்றும் வெளிநாட்டு உரிமை விற்பனைதான் என்பது தயாரிப்பாளர் தரப்பு வாதம்.

இந்த திருட்டு வீடியோவைத் தடுக்க வழிதெரியாமல் தயாரிப்பாளர்கள் திண்டாடிக் கொண்டுள்ளனர்.

இந்த சூழலில் நேற்று வெளியான காக்கிச் சட்டை படத்தின் திருட்டு வீடியோ, நேற்று காலையே பல இணையதளங்களில் காணக் கிடைத்துள்ளது. அதுவும் தெளிவான 5.1 ஒலித் தரத்துடன் கூடிய வீடியோவாக.

திருட்டு சிடி விற்பவர்களும் ஜோராக தெருவுக்குத் தெரு விற்றுக் கொண்டிருக்கிறார்கள்.

என்னை அறிந்தால் படத்தின் திருட்டு சிடி, படம் வெளியாவதற்கு முன்பே வெளியாகிவிட்டது நினைவிருக்கலாம்.