ரஜினிக்கே வினை வைக்கும் ராகவா லாரன்ஸ்… ஜெயிலர் படத்தை கார்னர் செய்யும் சந்திரமுகி 2?

ஜெயிலர் செகண்ட் ஷெட்யூல்

அண்ணாத்த படத்தை தொடர்ந்து ரஜினி நடித்து வரும் ஜெயிலர் மீது ரசிகர்களிடம் அதிக எதிர்பார்ப்பு காணப்படுகிறது. கலெக்‌ஷனில் அண்ணாத்த கல்லா கட்டினாலும் மோசமான திரைக்கதையால் ரொம்பவே நெகட்டிவான விமர்சனங்களைப் பெற்றது. இதனால் ஜெயிலர் படத்தில் தரமான கம்பேக் கொடுக்க வேண்டும் என சூப்பர் ஸ்டார் ரஜினி தீயாக வேலை செய்து வருகிறார். கோலமாவு கோகிலா, டாக்டர் என சூப்பர் ஹிட் கொடுத்த நெல்சன், 'பீஸ்ட்' படத்தில் மொத்தமாக சொதப்பிவிட்டார். இதையும் மீறி ஜெயிலர் படத்தை இயக்கும் வாய்ப்பை நெல்சனுக்கு கொடுத்துள்ளார் ரஜினி.

ஜெயிலருக்கு வந்த சிக்கல்

ஏற்கனவே நெல்சன் மீது நம்பிக்கையில்லாமல் தொடங்கிய ஜெயிலர் ஷூட்டிங், இப்போது அசுர வேகத்தில் சென்று கொண்டிருக்கிறது. சில தினங்களுக்கு முன்னர் சிவராஜ்குமாரும் ஜெயிலர் படத்தில் நடிப்பது உறுதியானது. இதெல்லாம் ஜெயிலர் மீதான எதிர்பார்ப்பை நாளுக்கு நாள் அதிகரிக்க செய்தாலும், இப்போது ரிலீஸ் தேதியில் சிக்கல் ஏற்பட்டுள்ளதாம். ரஜினிக்கு எப்போதுமே தமிழ்ப் புத்தாண்டில் அவரது படங்கள் வெளியாவது செண்டிமெண்டான விஷயம். அதேபோல், ஜெயிலர் படத்தையும் அடுத்தாண்டு தமிழ்ப் புத்தாண்டுக்கு வெளியிட படக்குழு திட்டமிட்டுள்ளது. ஆனால், ஜெயிலருக்குப் போட்டியாக ராகவ லாரன்ஸும் களமிறங்கவுள்ளாராம்.

சந்திரமுகி 2 ரிலீஸ்

சூப்பர் ஸ்டார் ரஜினியின் அதிதீவிர ரசிகரான ராகவா லாரன்ஸ், இப்போது சந்திரமுகி 2 படத்தில் நடித்து வருகிறார். ரஜினி நடிப்பில் ப்ளாக் பஸ்டர் ஹிட் அடித்த சந்திமுகி படத்தின் இரண்டாம் பாகம் தான் இது. பி வாசு இயக்கும் இந்தப் படத்தில் ராகவா லாரன்ஸுடன் வடிவேலு, ராதிகா உள்ளிட்ட பலர் நடித்து வருகின்றனர். இந்நிலையில், இந்தப் படமும் அடுத்தாண்டு தமிழ்ப் புத்தாண்டு தினத்தில் வெளியாகும் என சொல்லப்படுகிறது. இதனால், ஜெயிலர் படத்தின் கலெக்‌ஷனில் பாதிப்பு ஏற்படும் என தெரிகிறது.

ஆர்சி 15, பொன்னியின் செல்வன் 2

ஏற்கனவே ராம் சரண் நடிப்பில் ஷங்கர் இயக்கும் ஆர்சி 15 திரைப்படமும் தமிழ்ப் புத்தாண்டை குறிவைத்துள்ளதாக தகவல் வெளியாகியுள்ளது. இப்போது சந்திரமுகி இரண்டாம் பாகமும் இந்த லிஸ்ட்டில் இணைந்துள்ளது ஜெயிலர் படத்துக்கு தலை வலியாக அமைந்துள்ளது. அதுமட்டும் இல்லாமல் மணிரத்னம் இயக்கியுள்ள பொன்னியின் செல்வன் இரண்டாம் பாகம், ஏப்ரல் 28ம் தேதி ரிலீஸாகலாம் எனக் கூறப்படுகிறது. முதல் பாகத்தை போலவே பொன்னியின் செல்வன் 2க்கும் அதிக வரவேற்பு காணப்படுகிறது. இதனால், ஜெயிலர் படத்துக்கு நினைத்த எண்ணிக்கையில் தியேட்டர்கள் கிடைப்பதில் சிக்கல் இருக்கும் எனக் கூறப்படுகிறது.