அக்டோபரில் ஆடியோ... நவம்பரில் டீசர்... டிசம்பரில் ட்ரைலர்... இது ரஜினியின் 2.ஓ அப்டேட்!

இந்தப் படத்தின் விளம்பரப் பணிகளை ஏற்கெனவே உலகளாவிய அளவில் தொடங்கிவிட்டது லைகா நிறுவனம். ஹாலிவுட்டிலும், பிரிட்டனிலும் படத்தின் விளம்பரம் பொறித்த வெப்பக் காற்று பலூன்களை பறக்க விட்டுள்ளனர். இந்த நிலையில் படத்தின் இசை வெளியீடு, டீசர் மற்றும் ட்ரைலர் வெளியீடு குறித்த அதிகாரப்பூர்வ அறிவிப்பை வெளியிட்டுள்ளார் லைகா நிர்வாகி ராஜு மகாலிங்கம்.

2.ஓ படத்தின் இசை வெளியீட்டு விழாவை துபாயில் நடத்தப் போவதாக அறிவித்துள்ளார்கள். இதில் ரஜினிகாந்த் உள்ளிட்ட நட்சத்திரங்கள், கலைஞர்கள் பங்கேற்கிறார்கள்.

படத்தின் முதல் டீசரை வரும் நவம்பர் மாதம் வெளியிடவிருக்கின்றனர். ஹைதராபாத் நகரில் கோலாகலமாக இந்த வெளியீட்டு விழா நடக்கிறது.

முத்தாய்ப்பாக ட்ரைலர் வெளியீட்டு விழா நடக்கவிருக்கிறது. இந்த நிகழ்ச்சி சென்னையில் மிகப் பிரமாண்டமாக நடக்க உள்ளது. இந்த நிகழ்ச்சியில் இந்திய திரையுலகமே பங்கேற்கும் வகையில் வடிவமைத்துள்ளனர்.

இந்த மூன்று நிகழ்ச்சிகளும் அடுத்தடுத்து மூன்று மாதங்களில் நடக்கவிருப்பதை ராஜு மகாலிங்கம் உறுதிப்படுத்தியுள்ளார்.

வரும் 2018- ஜனவரி 25-ம் தேதி உலகெங்கும் 20 ஆயிரம் அரங்குகளில் 2.ஓ படத்தை வெளியிடப் போவதாக லைகா ஏற்கெனவே அறிவித்துள்ளது.