ஜெயிலர் படத்தில் ரஜினியின் கேரக்டர் இதுதானா...? இன்று மாலை காத்திருக்கும் மாஸ் அப்டேட்!

பிறந்தநாள் கொண்டாடும் சூப்பர் ஸ்டார்

தமிழ்த் திரையுலகின் சூப்பர் ஸ்டார் என ரசிகர்களால் கொண்டாடப்படும் ரஜினிகாந்த், இன்று தனது 72வது பிறந்தநாளை கொண்டாடுகிறார். வில்லனாக தனது கேரியரை தொடங்கியவர் தற்போது பல கோடி ரசிகர்களின் ஆதர்ச நாயகனாக வலம் வருகிறார். ஸ்டைலான ஆக்டிங், பஞ்ச் டயலாக்ஸ், கெத்தான பெர்ஃபாமன்ஸ் என வெரைட்டியாக ரவுண்டு கட்டி வரும் ரஜினி, தற்போது ஜெயிலர் படத்தில் நடித்து வருகிறார். நெல்சன் இயக்கும் இந்தப் படத்தின் படப்பிடிப்பு வேகமாக நடைபெற்று வருகிறது.

சூப்பர் ஸ்டார் கேரக்டர் அறிமுகம்

சன் பிக்சர்ஸ் தயாரிப்பில் நெல்சன் இயக்கும் ஜெயிலர் படத்தில், ரஜினியுடன் கன்னட சூப்பர் ஸ்டார் சிவ ராஜ்குமார், ரம்யா கிருஷ்ணன், யோகி பாபு, வசந்த் ரவி, விநாயகன் உள்ளிட்ட பலர் நடித்து வருகின்றனர். அனிருத் இந்தப் படத்திற்கு இசையமைத்து வருகிறார். விறுவிறுப்பாக படப்பிடிப்பு நடைபெற்று வரும் ஜெயிலர், 2023 தமிழ்ப் புத்தாண்டு தினத்தில் வெளியாகும் என எதிர்பார்க்கப்படுகிறது. இந்நிலையில், ரஜினியின் பிறந்தநாளை முன்னிட்டு இன்று மாலை அவரது கேரக்டர் பற்றிய அப்டேட்டை படக்குழு வெளியிட உள்ளது.

முத்துவேல் பாண்டியனின் மாஸ் என்ட்ரி

அதன்படி, இன்று மாலை 6 மணிக்கு முத்துவேல் பாண்டியன் வருகிறார் என்ற கேப்ஷனுடன் போஸ்டரை வெளியிட்டுள்ளது படக்குழு. தெறி மாஸ்ஸான போஸ்டருடன் வெளியாகியுள்ள இந்த அப்டேட், ரஜினி ரசிகர்களிடம் அதிக எதிர்பார்ப்பை ஏற்படுத்தியுள்ளது. ரஜினி ஜெயிலராக நடிப்பது உறுதியாகி இருந்தாலும், அவரது கேரக்டரின் பெயர் என்ன என்பது இதுவரை சஸ்பென்ஸாகவே இருந்தது. இந்நிலையில், ரஜினியின் கேரக்டர் முத்துவேல் பாண்டியன் என்ற அறிவிப்பை படக்குழு வெளியிட்டுள்ளது.

ரிலீஸ் தேதி அப்டேட் வருமா?

ரஜினியின் முத்துவேல் பாண்டியன் என்ற கேரக்டர் செம்ம மாஸாக இருக்கும் என ரசிகர்கள் எதிர்பார்த்துள்ளனர். அதேபோல், இந்த அப்டேட்டுடன் ஜெயிலர் ரிலீஸ் தேதியை படக்குழு அறிவிக்குமா என்ற எதிர்பார்ப்பும் எழுந்துள்ளது. அதேபோல் லால் சலாம் படத்தில் இருந்தும் அப்டேட் வெளியாகும் என சொல்லப்படுகிறது. சிவாஜி படத்தின் ஒரு காட்சியில் "பராசக்தி ஹீரோடா" என வில்லனிடம் பஞ்ச் வசனம் பேசுவார் ரஜினி. அதேபோல், ஜெயிலர் படத்தில் "கில்லி வில்லன்டா" என பஞ்ச் அடிப்பாரா என நெட்டிசன்கள் கமென்ட்ஸ் செய்து வருகின்றனர். கில்லி படத்தில் வில்லனாக வரும் பிரகாஷ்ராஜின் கேரக்டர் முத்துவேல் பாண்டியன் என்பது குறிப்பிடத்தக்கது.