படையப்பா வெளியாகி 23 வருஷம் ஆகிடுச்சாம்..PadayappaTheGOAT ஹாஷ்டேக்கை டிரெண்ட் செய்யும் ரசிகர்கள்!

23 ஆண்டுகளை கடந்த படையப்பா

"என் வழி தனி வழி", கிரைனட் மலை, அந்த பாம்பு புத்துக்குள்ள எப்படி கையை விட்டீங்க, ஊஞ்சல் சீன், ஒரே அறையில் வனவாசம் இருக்கும் நீலம்பரி, சிவாஜியின் கெஸ்ட் அப்பியரன்ஸ் ஏ.ஆர். ரஹ்மானின் பாடல்கள் என ஏகப்பட்ட வெயிட்டேஜ் காட்சிகளுடன் என்றுமே மறக்க முடியாத ஒரு படமாக நடிகர் ரஜினிகாந்துக்கு அமைந்த படம் தான் படையப்பா. அப்படியொரு படத்தில் நடிக்க வேண்டும் என்கிற ஆசை எந்த நடிகருக்கும் இயல்பாகவே வரும் அந்த அளவுக்கு படையப்பா படத்தில் ஏகப்பட்ட விஷயங்கள் உள்ளன. படையப்பா படம் வெளியாகி 23 ஆண்டுகள் நிறைவடைந்து விட்டன.

உங்களுக்கு வயசே ஆகல

23 ஆண்டுகளுக்கு முன்னதாக எடுக்கப்பட்ட படையப்பா படத்திலேயே நடிகர் ரஜினிகாந்துக்கு வயதாகி விட்டதை குறிக்கும் "வயசானாலும் உன் ஸ்டைல் இன்னும் மாறவில்லை" என்கிற வசனமும் அப்பாஸ் பேசும், "உங்களுக்கு வயசே ஆகலை" என்கிற வசனமும் நடிகர் ரஜினிகாந்துக்கு எப்போதுமே பொருந்தும். 23 ஆண்டுகள் கடந்தும் இன்னமும் அண்ணாத்த, தலைவர் 169 என கெத்துக் காட்டி வருகிறார் நடிகர் ரஜினிகாந்த்.

படையப்பா The GOAT

அது என்னப்பா எதுக்கெடுத்தாலும் GOAT என ஆடு பெயரை வைத்து அழைக்கின்றனர் என நினைக்க வேண்டாம். Greatest of All Time என்பதன் சுருக்கமே GOAT என அழைக்கப்படுகிறது. படையப்பா படம் 23 ஆண்டுகளை கடந்துள்ள நிலையில், #PadayappaTheGOAT என்கிற ஹாஷ்டேக்கை ரஜினி ரசிகர்கள் சும்மா தெறிக்க விட்டு வருகின்றனர்.

அதிக சம்பளம்

"அத்தனை பேருக்கும் பேசியதை விட ஒரு மடங்கு அதிக சம்பளம்.. வெற்றிவிழாவில் கலைஞர்களுக்கு தங்கசெயின் பரிசு. பட லாபத்தில் கல்வி அறக்கட்டளை தொடங்கினார். படத்தில் பயன்படுத்திய பொருட்களை விற்று அதில் வந்த பணத்தை சினிமா தொழிலாளர்களுக்கு கொடுத்தார் ரஜினிகாந்த்" என படையப்பா படத்தின் வரலாற்றையும் ரசிகர்கள் பதிவிட்டு வருகின்றனர்.

நக்மா மாற்றம்

செளந்தர்யாவுக்கு முன்னதாக படையப்பா படத்தில் நடிகை நக்மா ஒப்பந்தம் செய்யப்பட்டு இருந்தார். ஆனால், சில நாள் ஷூட்டிங்கிற்கு பிறகு அவர் அதிரடியாக மாற்றப்பட்டு செளந்தர்யா நடிக்க ஒப்பந்தமானார். இயக்குநர் கே.எஸ். ரவிக்குமார், ரஜினிகாந்த் உடன் நக்மா படையப்பா படத்தின் ஷூட்டிங் ஸ்பாட்டில் இருக்கும் அரிய புகைப்படம். பாட்ஷா படத்தில் ரஜினிக்கு ஜோடியாக நக்மா நடித்திருந்தது குறிப்பிடத்தக்கது.

முதல் 50 கோடி

தமிழ் சினிமாவிலேயே முதல் முறையாக 50 கோடி ரூபாய் வசூல் சாதனை படைத்த படம் படையப்பா தான் என்கின்றனர். தென்னிந்திய சினிமாவிலேயே அதிக வசூல் சாதனை படைத்த படமும் படையப்பா தான் என ஏகப்பட்ட தகவல்கள் வெளியாகி உள்ளன. அன்றும் இன்றும் என்றும் பாக்ஸ் ஆபிஸ் பாட்ஷாவாக கோலோச்சி வருகிறார் நடிகர் ரஜினிகாந்த். படையப்பா 2ம் பாகத்திற்கான பேச்சுவார்த்தைகளை கே.எஸ். ரவிக்குமார் எடுத்து வருவதாக தகவல்கள் வெளியாகி உள்ளன. அப்படி உருவானால், வேற லெவலில் இருக்கும் என்பது கன்ஃபார்ம்.