ரெண்டு இட்லி ஒரு வடை சாப்பிட அனைவரையும் அன்புடன் அழைக்கின்றோம்

சென்னை: ரெண்டு இட்லி ஒரு வடை தமிழ்நாட்டில் உள்ள அனைத்து உணவகங்களிலும் பிரசித்தி பெற்ற வார்த்தை இது, அதே போன்று உணவகங்களின் மெனு கார்டிலும் தவறாமல் முதலிடம் மேலே சொன்ன 2 உணவுகளுக்கும் உண்டு.

தற்போது இதே பெயரில் ஒரு படமொன்று தமிழ் சினிமாவில் உருவாகி வருகிறது, இயக்குநர் என்ற படத்தை எடுத்த படத்தின் இயக்குநர் ரஜத் தனது மகன் பிரமோத்தை இந்தப் படத்தின் மூலம் நாயகனாக அறிமுகப் படுத்துகிறார்.

தனது முதல் படத்தை தானே இயக்கி நாயகனாகவும் நடித்த ரஜத், இரண்டாவது படமான ரெண்டு இட்லி ஒரு வடை திரைப்படத்தில் தனது மகனை வைத்து இயக்குகிறார். இயக்கம் மட்டுமல்லாது ஒளிப்பதிவு மற்றும் தயாரிப்பு போன்றவற்றையும் ரஜத்தே கவனித்துக் கொள்வாராம்.

இந்தப் படத்தில் நாயகனாக அறிமுகமாகும் பிரமோத் படத்தின் இசையமைப்பாளராகவும் அறிமுகமாகிறார் (ஒரு நாயகன் உதயமாகிறான்), இவருக்கு 17 வயதே ஆவது குறிப்பிடத்தக்கது.

இந்தப் படம் தமிழ் தவிர்த்து தெலுங்கு மற்றும் ஹிந்தி மொழிகளிலும் வெளியாக இருக்கின்றது, படத்தை ஆங்கிலப் படங்களுக்கு நிகராக எடுக்கவிருக்கிராறாம் இயக்குநர் ரஜத்.

இவரின் இயக்கத்தில் வெளியான இயக்குநர் திரைப்படம் 60 நாட்கள் ஓடி வெற்றி பெற்றதால்( அப்படி ஒரு படம் வந்துச்சா?), உற்சாகத்துடன் இட்லி, வடையைக் கையில் எடுத்திருக்கிறார் இயக்குநர்.

பொழுதுபோக்கு மற்றும் சமூக விழிப்புணர்வுடன் உருவாகி வரும் ரெண்டு இட்லி ஒரு வடை படத்தின் விளம்பரத்தை பாருங்கள், 2 இட்லி ஒரு வடை சாப்பிட உங்கள் அனைவரையும் வருக வருக என அன்புடன் அழைக்கின்றோம்.ஒருவேளை தியேட்டர்ல படம் பார்க்க வர்றவங்களுக்கு இட்லி, வடை எல்லாம் தருவாங்களோ...

இது கூட பரவால்ல பாஸ் இவரோட அடுத்த பட தலைப்பு என்ன தெரியுமா? ஒரு மசால் தோசையும் 35 கதாநாயகிகளும் முடியல....