ஆக 8-ல் மலேசியாவில் பிரஷாந்தின் சாஹசம் பட பிரமாண்ட இசை வெளியீடு!

பிரஷாந்த் நடித்துள்ள சாஹசம் படத்தின் இசை வெளியீடு மலேஷியாவில் பிரமாண்டமாய் வெளியாகிறது.

வரும் ஆகஸ்ட் 8-ம் தேதி கோலாலம்பூரில் மாலை 7 மணிக்கு இந்த நிகழ்ச்சி நடக்கிறது.

தியாகராஜன் தயாரித்துள்ள இந்தப் படத்தில் பிராஷாந்துக்கு ஜோடியாக அமென்டா என்ற புதுமுக நடிகை நடித்துள்ளார். அருண்ராஜ் வர்மா இயக்கியுள்ளார். எஸ்எஸ் தமன் இசையில் அனைத்துப் பாடல்களையும் லட்சுமி மேனன், சிம்பு உள்ளிட்ட பிரபலங்கள் பாடியுள்ளனர்.

இசை வெளியீடு நிகழ்ச்சி கோலாலம்பூர் நகரில் உள்ள ப்ரிக்ஃபீல்ட் அரங்கில் வண்ணமயமாய் நடக்கவிருக்கிறது. மாலை 7 மணிக்குத் தொடங்கி 9 மணி வரை நடக்கும் இந்த நிகழ்ச்சியை டிடி எனும் திவ்யதர்ஷினி தொகுத்து வழங்குகிறார்.

இந்தப் படத்தில் இடம்பெற்றுள்ள 'சாயாங் கு...' என்ற பாடலுக்கு மேடையிலேயே நடனம் ஆடுகிறார் பிரஷாந்த். அவருடன் ரசிகர்களும் இணைந்து நடனமாடுகின்றனர்.

இதற்காக நாளை வெள்ளிக்கிழமை மலேசியாவுக்கு பிரஷாந்த், தியாகராஜன் உள்ளிட்ட குழுவினர் புறப்படுகின்றனர்.