நாளை 11 படங்கள் ரிலீஸ்.. ஒரு வாரம் ஓடுனா போதும்னு நினைச்சிட்டாங்களோ..?

சினிமாவை அடுத்த கட்டம் நோக்கி நகர்த்துவதற்கு இம்மாதிரியான நல்ல கதையம்சம் கொண்ட சிறு பட்ஜெட் படங்களின் வெற்றி அவசியமானதாகும். சமீபத்தில் வெளிவந்த 'குரங்கு பொம்மை' திரைப்படம் ரசிகர்கள் மத்தியில் பாராட்டைப் பெற்றது குறிப்பிடத்தக்கது.

ஆயுத பூஜையை ஒட்டி மகேஷ்பாபுவின் முதல் நேரடித் தமிழ்ப் படமான 'ஸ்பைடர்', விஜய் சேதுபதியின் 'கருப்பன்', நயந்தாரா நடிக்கும் 'அறம்' ஆகிய படங்கள் அடுத்த வாரம் ரிலீஸாக இருக்கின்றன.

ரசிகர்கள் எதிர்பார்த்த 'மகளிர் மட்டும்', 'துப்பறிவாளன்' படங்கள் கடந்த வாரமே வெளியான நிலையில் இந்த வாரம் பெரிய நடிகர்களின் படங்கள் எதுவும் வெளியாகப்போவதில்லை. ஆனாலும் 11 படங்கள் ரிலீஸாக இருக்கின்றன.

ஆயுத பூஜைப் படங்கள் வெளிவருவதற்குள் ஒரு வாரமாவது ஓட்டிவிட வேண்டும் என இந்த வாரம் 11 படங்கள் களத்தில் குதித்திருக்கின்றன. நாளை ராணா நடிக்கும் 'நானே ராஜு நானே மந்திரி' தெலுங்கு படத்தின் டப் ‘நான் ஆணையிட்டால்' வெளிவருகிறது.

நாசர், அனுஹாசன் நடித்துள்ள ‘வல்லதேசம்', சரண் இயக்கத்தில் வினய் நடித்துள்ள ‘ஆயிரத்தில் இருவர்', இனிகோ பிரபாகர் நடித்திருக்கும் ‘பிச்சுவாகத்தி', ‘களவுத் தொழிற்சாலை' ஆகிய படங்கள் நாளை வெளியாக இருக்கின்றன.

கோகுல் நடிக்கும் ‘கொஞ்சம் கொஞ்சம்', ‘பயமா இருக்கு', ‘நெறி', ‘காக்கா', ‘தெருநாய்கள்', ஓவியா மலையாளத்தில் நடித்து தமிழில் டப் செய்யப்பட்டுள்ள ‘போலீஸ் ராஜ்ஜியம்' ஆகிய 11 படங்கள் வெளிவரவிருக்கின்றன. இவற்றில் எந்தெந்தப் படங்கள் ரசிகர்களின் வரவேற்பைப் பெறும் எனப் பொறுத்திருந்து பார்க்கலாம்.