பத்து தல புது ரிலீஸ் தேதி... போஸ்டரில் கெத்து காட்டிய சிம்பு... கூஸ்பம்ஸான ரசிகர்கள்!

சிம்புவின் கேங்ஸ்டர் அவதாரம்

கடந்தாண்டு வெளியான மாநாடு திரைப்படம் மூலம் கம்பேக் கொடுத்த சிம்பு, அதனைத் தொடர்ந்து வெந்து தணிந்தது காடு படத்தில் நடித்திருந்தார். கெளதம் மேனன் இயக்கத்தில் கடந்த செப்டம்பர் மாதம் ரிலீஸான 'வெந்து தணிந்தது காடு', சிம்புவுக்கு மேலும் ஒரு சூப்பர் கம்பேக் படமாக அமைந்தது. இந்தப் படத்தில் முத்து என்ற கேரக்டரில் கேங்ஸ்டர் குரூப்பில் ஒருவராக நடித்திருந்தார் சிம்பு. மேலும் இதன் அடுத்த பாகம் விரைவில் உருவாகும் எனவும், அதில் சிம்பு கேங்ஸ்டராகவே நடிக்க உள்ளதாகவும் சொல்லப்படுகிறது.

பத்து தல ஏஜிஆர்

மாநாடு, வெந்து தணிந்தது காடு மூலம் மீண்டும் தனது ஆட்டத்தை தொடங்கியுள்ள சிம்புவின் படங்களுக்கு ரசிகர்களிடம் அதிக எதிர்பார்ப்பு காணப்படுகிறது. இந்நிலையில், அவர் நடித்து வந்த 'பத்து தல' படத்தின் ஷூட்டிங், கடந்த மாதம் 23ம் தேதி நிறைவடைந்தது. ஆனால், டிசம்பர் மாதம் ரிலீஸாகவிருந்த பத்து தல சில காரணங்களால் தள்ளி வைக்கப்படுவதாக படக்குழு அறிவித்திருந்தது. இந்தப் படத்தில் ஏஜிஆர் என்ற கேங்ஸ்டராக சிம்பு நடித்துள்ளது குறிப்பிடத்தக்கது.

புதிய ரிலீஸ் தேதி

இந்நிலையில், பத்து தல சிம்புவின் பிறந்தநாளை முன்னிட்டு, பிப்ரவரி 3ம் தேதி வெளியாகும் என எதிர்பார்க்கப்பட்டது. ஆனால் ரசிகர்களின் இந்த எதிர்பார்ப்புக்கு படக்குழு தரப்பில் இருந்து தற்போது பதில் கிடைத்துள்ளது. அதன்படி, பத்து தல திரைப்படம் 2023ம் ஆண்டு மார்ச் 30ம் தேதி வெளியாகும் என படக்குழு அதிகாரப்பூர்வமாக அறிவித்துள்ளது. கடந்த மாதம் தான் சூட்டிங் நிறைவானதால், போஸ்ட் புரொடக்ஷன் வேலைகளில் இயக்குநர் கிருஷ்ணா பிஸியாக இருக்கிறார். அதனால், மார்ச் மாதம் இறுதியில் பத்து தல ரிலீஸ் தேதியை ஸ்டூடியோ கிரீன் நிறுவனம் முடிவு செய்துள்ளது.

சிம்புவின் 50வது திரைப்படம்

பத்து தல படத்தின் புதிய ரிலீஸ் தேதியை அறிவித்துள்ள படக்குழு, சிம்புவின் செம்ம கெத்தான போஸ்டரையும் ரிலீஸ் செய்துள்ளது. அதில் காரின் பேனட்டில் கறுப்பு வேஷ்டி, சட்டையில் சிம்பு மாஸ்ஸாக அமர்ந்திருப்பதை ரசிகர்கள் ட்ரெண்ட் செய்து வருகின்றனர். கன்னடத்தில் சிவ ராஜ்குமார் நடிப்பில் சூப்பர் ஹிட் அடித்த 'முஃப்தி' படத்தின் தமிழ் ரீமேக்கான பத்து தல படத்தில் சிம்புவுடன் பிரியா பவானி சங்கர், கவுதம் கார்த்திக், கலையரசன் உள்ளிட்ட பலர் நடித்துள்ளனர். ஏஆர் ரஹ்மான் இசையமைக்கும் படத்தை, ஸ்டூடியோ கிரீன் தயாரித்துள்ளது. இந்நிலையில், சிம்பு தனது 50வது திரைப்படம் பிரம்மாண்டமாக இருக்க வேண்டும் என முடிவெடுத்துள்ளாராம். சூப்பர் மேன் கதையுடன் ஏஆர் முருகதாஸ் காத்திருப்பதாகவும், இந்தக் கூட்டணியில் தான் சிம்புவின் 50வது திரைப்படம் உருவாகும் எனவும் சொல்லப்படுகிறது.