லாக்டவுனில் நடிகை சுகாசினி இயக்கிய ’சின்னஞ்சிறு கிளியே..’ ஐபோன்லயே மொத்த படத்தையும் எடுத்தாராமே?

கொரோனா வைரஸ்

இதற்கு இன்னும் மருந்து கண்டுபிடிக்கவில்லை என்பதால் கொரோனா வேகமாக பரவி வருகிறது. இந்தியாவிலும் இந்த வைரஸ் தொற்றின் தாக்கம் அதிகரித்து வருகிறது. இந்த வைரஸால் பாதிக்கப்பட்டவர்கள் எண்ணிக்கை 56 ஆயிரத்தை கடந்துள்ளது. இந்த எண்ணிக்கை மேலும் உயரும் என்று கூறப்படுகிறது. லாக்டவுன் பிறப்பிக்கப்பட்டும் கொரோனா பரவி வருவதால், மக்கள் அச்சமடைந்துள்ளனர்.

குறும்படம்

இந்நிலையில் லாக்டவுன் காரணமாக பொதுமக்கள் வீடுகளில் முடங்கி கிடக்கின்றனர். நடிகர், நடிகைகள் வீடுகளில் இருந்தபடி தாங்கள் என்ன செய்கிறோம் என்பதை வீடியோ எடுத்து தங்களது சமூக வலைத்தளப் பக்கத்தில் வெளியிட்டு வருகின்றனர். இந்நிலையில் நடிகை சுகாசினி இந்த லாக்டவுனில் குறும்படம் ஒன்றை இயக்கியுள்ளார்.

அஹானா கிருஷ்ணா

‘என் லாக்டவுன் கதைகள். என் முதல் குறும்படம், என் ஐபோனிலேயே எடுக்கப்பட்ட படம். டெக்னீஷியன்ஸ், லைட்ஸ் இல்லாமல் எடுக்கப்பட்ட படம். கெவின் தாஸ் எடிட்டிங். ஜேம்ஸ் வசந்தன் இசை அமைத்துள்ளார். விரைவில் வெளியாகும்' என்று தெரிவித்துள்ளார் சுகாசினி. 20 நிமிடம் ஓடும் இந்தக் குறும்படத்தில், இதில், மலையாளத்தில் லூகா, பதினெட்டாம் படி உட்பட சில படங்களில் நடித்துள்ள அஹானா கிருஷ்ணா, சாருஹாசன், சுகாசினி உட்பட பலர் நடித்துள்ளனர்.

ரசிகர்கள் ஆர்வம்

இதற்கு சின்னஞ்சிறு கிளியே என்று டைட்டில் வைத்துள்ளார் அவர். இதையடுத்து நடிகை குஷ்பு, நடிகர் மனோபாலா உள்ளிட்ட சில திரையுலகினரும் ஏராளமான ரசிகர்கள் அவருக்கு வாழ்த்துக்களைத் தெரிவித்துள்ளனர். இந்தப் படத்தை பார்க்க ஆர்வமாக இருப்பதாகத் தெரிவித்துள்ளனர். நடிகை சுகாசினி, ஏற்கனவே அரவிந்த்சாமி, அனு ஹாசன் நடித்த 'இந்திரா' படத்தை இயக்கியுள்ளார்.