15 வருசத்துக்குப் பிறகு மீண்டும் சந்தித்த கதிர், அனிதா.. பிளாஷ் பேக்குக்கு போன 7ஜி ரசிகர்கள்!

கதிர் அனிதா சந்திப்பு:

கட்டக்குரலில் பாடுபவர்களை கலாய்க்க இன்றைக்கும் நம்ம பசங்க பயன்படுத்துவது 'ராஜா ராஜாதி ராஜனென்ற ராஜா' சீனை தான். இப்படி நம்ம பசங்க மனசுல ஆழமா பதிஞ்சுபோன அனிதாவும் கதிரும் 15 வருஷம் கழிச்சு திரும்பவும் சந்திச்சு பேசியிருக்காங்க. இந்த சந்திப்பின் போது எடுத்த போட்டோவை தனது டிவிட்டர் பக்கத்தில் வெளியிட்டிருக்கிறார் சோனியா அகர்வால்.

இன்ப அதிர்ச்சி:

"பல வருடங்கள் கழித்து நேற்று இரவு நான் யாரை சந்தித்தேன் தெரியுமா... 7ஜி ரெயின்போ காலனி கதிரை. என்ன ஒரு சந்தோஷம். அனிதாவின் ஞாபகங்கள் மனதில் தோன்றின", என சோனியா தனது மகிழ்ச்சியை பகிர்ந்துள்ளார். அந்தப் புகைப்படத்தைப் பார்த்த ரசிகர்கள் இன்ப அதிர்ச்சி அடைந்தனர். காரணம் அதில் ரவி கிருஷ்ணாவும் சரி, சோனியாவும் சரி 15 வருடங்களுக்கு முன்பு பார்த்த மாதிரியே இருந்தன.

காலத்தால் அழியாத காதல்:

இந்த டிவீட்டை பார்த்த நமக்கே இத்தனை ஞாபகங்கள் வருகிறதென்றால், உண்மையான கதிருக்கும் அனிதாவுக்கும் எத்தனை வந்திருக்க வேண்டும். சில படங்கள் காலத்தால் அழியாது. அப்படிப்பட்ட ஒரு படம் தான் 7ஜி ரெயின்போ காலனி. செல்வராகவனின் அனிதாவும், கதிரும் காலத்தால் அழியாத பிம்பங்கள்.

பிளாஷ் பேக்கிற்குப் போன ரசிகர்கள்:

சோனியாவின் இந்த டிவீட்டைப் பார்த்து 90ஸ் கிட்ஸ் தங்களது மலரும் நினைவுகளில் மூழ்கிப் போயுள்ளனர். ‘நானெல்லாம் இந்தப் படத்தைப் பார்த்து விட்டு ரெண்டு நாள் தூங்கவேயில்லை' எனப் பெண் ரசிகர் ஒருவர் கூறியுள்ளார். மேலும் பல ரசிகர்கள் அப்படத்தில் இடம் பெற்றிருந்த பிரபலமான வசனங்களைப் பகிர்ந்துள்ளனர்.